Sakialluut TB pinaveersaaqquaa

Sakialluutip pinaveersaartinneqarnissaanut paasisitsiniaaneq innuttaasut tikilllugit ingerlanneqassaaq, inatsisartut peqqissutsimut ataatsimiititaliaani siulittaasoq Olga P. Berthelsen oqarpoq.

Sakialluutip pinaveersaartinneqarneranut ukiuni kingullerni iliuuserineqartut ingerlaavaartumik ingerlatinneqartariaqartut Olga P. Berthelsen isumaqarpoq, aammalu iliuusissatut piareersarlugu suliarineqartup sukkanerusumik suliarineqarsinnaanissaa pisariaqarpoq, sakialluummik nappaateqartut ikilisinneqassammata, ataatsimiititaliap siulittaasua oqarpoq.

Olga P. Berthelsen aamma oqarpoq paasisitsiniaaneq inuit tikillugit ingerlanneqartariaqartoq.

Nunatsinni sakialluummik nappaateqartut siorna 114-upput.

Sakialluuteqarneq pillugu paasisitsiniaaneq TV-kkut ingerlanneqartoq naammanngilaq.

Inuit illoqarfimmut nunaqarfinnullu tikillugit oqaloqatigineqartariaqarput, meeqqerivinni atuarfinni allaanilu pinaveersaartitsineq pisariaqarpoq, Inatsisartut peqqissutsimut ataatsimiititaliaani siulittaasoq Olga P Berthelsen taamatut oqarpoq.

Nunatsinni nakorsaanerup Flemming Stenzip inuiaqatigiinni atugarissaaraanni atugarissaanngikkaluaraanniluunniit tuberkulosip bakteriaanik tunillatsinnissaq pinngitsoorniarlugu nammineerluta qanoq iliuuseqarsinnaanerput oqaatigaa.

- Kikkulluunniit sakialluummik nappaateqartut sulilu tunillatsissimanngitsut eqqiluisaarnissaat pingaaruteqarpoq. Soorlu nualluummik tunillatsinnissamut pinaveersaaraanni tangajornermi talligut atorlugit qanerput assertaripput imaluunniit kakkissarfiit atorlugit qanerput asserlugu immitsinnut illersortartugut, aamma assatta asannissaat pingaaruteqarpoq Flemming Stenz oqarpoq.

Peqqinnissamut naalakkersoq Agathe Fontain oqaaseqartinniaraluaratsigu iluatsinngilarput.