Saffiugassat qaqutigoortut pillugit aqqiagiinngissuteqarnermi Kina ajorsartoq
Saffiugassat nalitoorsuit avammut niuerutigineranni killilersuineq pillugu USA, EU aamma Japan ukiut marluk matuma siornagut naammagittaalliuuteqarmata.
Saffiugassat qaqutigoortut atortorissaarutini - soorlu qarasaasiani, assiliivinni, biilini, batteriini, oqarasuaatini angallattakkani qaartartunilu igeriuttakkani nalinginnaasumik atorneqartarput. Saffiugassallu taakku niuernermi aaqqiagiinngissutaapput, Kina illua tungaaniilluni, taavalu USA, EU aamma Japan illua tungaaniillutik.
Kinap saffiugassanik avammut tuniniaanini killilersimaarmagu, Washingtonimiit, Bryssellimiit Tokyomiillu maalaarput.
Tassami saffiugassat qaqutigoortut 97 procentii Kinami tunisassiarineqartarput - Kinamiullu tamakkuninnga kisermaassingajallutik niueruteqarnermikkut nammineq tunisassiortuminnik ajunngisaarfiginnittutut pisuutinneqarput.
Nunatta saffiugassaatai qaqutigoortut matumani aamma eqqaaneqarnikuupput, nunatsinni piiaasoqalerpat, nunat pisariaqartitsisut saffiugassanik pingaartunik taakkuninnga pilersorneqalersinnaammata.
Kinamiut oqarput, avammut tuniniaanermik killilersuinertik avatangiisinik mianerinninnermik saffiugassallu qaqutigoortut killeqarnerannik peqquteqartoq.
WTO aalajangiinerminik ullumi kingusinnerusukkut nalunaaruteqassasoq ilimagineqarpoq.
