Saffiugassat qaqutigoortut akii appariartorput

Kuannersuarni saffiugassanik qaqutigoortunik ukiut sisamat qaangiuppata qalluisinnaalernissani Greenland Minerals and Energyp neriuutigaa, saffiugassanilli qaqutigoortunik niuerfiit saffiugassat tamakku siornatigutulli pisiariumatiginngilaat. Atuagassiap Ingeniørenip nittartagaani tamanna atuarneqarsinnaavoq.
Allattoq Mads Lynge
apriilip 24-at 2013 12:05

Atuagassiap Ingeniørenip nittartagaani tamanna atuarneqarsinnaavoq.

Saffiugassat qaqutigoortut pisiariumaneqarnerat annikilliartorpoq, akillu appariartorlutik. Australiamiullu aatsitassarsioqatigiiffiata Greenland Minerals and Energyp saffiugassanik Kuannersuarnit piialersinnaanissaa ilimagisamit isertitsiffiunnginnerussasoq, atuagassiaq Ingeniøren ilaatigut allappoq.

Saffiugassanik qaqutigoortunik niuerfiit saffiugassat tamakku pisiariumannginnerussagaat ilimagineqarpoq, akillu tassa taamaammat appassallutik. Dansk Industri taama isumaqarpoq.

Saffiugassalli qaqutigoortut Europamiunit soqutigineqarnerulertariaqartut taakku isumaqarput, Kina taaamaasilluni isumalluutaavallaarunnaarsinnaaniassammat.

USA-p saffiugassanik qaqutigoortunik tunisassiulersimanera ilaatigut pissutaalluni Kinap nunani tamani niuffannermut isumalluutaanera 95 procentinit 87 procentinut appariarsimavoq, saffiugassallu qaqutigoortut akii tamanna pissutigalugu appariarsimasut, Peter Bay Kirkegaardip Dansk Industrimeersup, Ingeniørenimut uppernarsarpaa.

- Nunat tamalaat niueqatigiinnikkut suleqatigiiffia, WTO, EU, USA aamma Japan sinnerlugu Kinamik eqqartuussisulersuussivoq. Saffiugassat qaqutigoortut Kinameersut nunanit allanit pisiarineqarsinnaalersimanissaannik tamanna kinguneqarsimagunarpoq. Saffiugassallu tamakku Kinami aamma naammattorsuupput, Peter Bay Kirkegaard nassuiaavoq.

Kinamiulli kisermaassinerat imaaliallaannarlugu allanngortinneqarsinnaanngitsoq, taassuma aamma erseqqissaatigaa.

Saffiugassanimmi qaqutigoortunik piiaaginnaratik nunanut allanut naleqqiullugu Kinamiut aamma tunisassiorsinnaassuseqarnerupput.

Kuannersuarni saffiugassarsiortoqalissappat akit suli apparnerusinnaasut aamma eqqarsaatigineqartariaqarpoq, tassami saffiugassat qaqutigoortut Nunarsuarmi 10 procentii Kuannersuarni qallorneqarsinnaanissaat ilimagineqarpoq:

- Akit appariassapput, Peter Bay Kirkegaard siulittuivoq, saffiugassalli tamakku Europami tunisassiarineqarnissaat pingaaruteqartoq oqaatigalugu. Kinamiummi tamakkuninnga pilersuisuunerat taamaasilluni isumalluutaavallaarunnaarsinnaassaaq. Kinamiummi tamakkuninnga aamma pilersuinerminni matuseriataarsinnaasarmata, Peter Bay Kirkegaard, Dansk Industrimeersoq oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk