Saarullittassiissutit ilaneqarput

Aalisarneq tunitsiviillu ukiup sinneranut ingerlaannarnissaat qulakkeerumallugu sinerissap qanittuani saarullittassiissutit 2.500 tonsinik ilaneqassasut, Naalakkersuisut tallimanngormat aalajangerput
Assi © : Nick Rahaim/Flickr Creative Commons
decembarip 06-at 2015 15:21

Ukioq maannamut saarullittassiissutigineqartut 25.000 tonsiusut 27.500 tonsinngorput.

- Saarullinniarneq ukiup sinneranut maannakkut unitsinneqarpat, tamanna sumiiffinnut suliffissaaleqinermik aningaasarsiorfissaaleqinermillu angisuumik kinguneqassaaq. Taamaattumik saarullittassiissutit Naalakkersuisut amerlivaat, aalisarnermut, piniarnermut nunalerinermullu naalakkersuisoq, Karl-Kristian Kruse tusagassiuutinut nalunaarummi oqarpoq.

Aamma atuaruk Saarullittassiissutit uummassusilerisunit annilaaganartoqartinneqarput

Paasinneqatigiinnerulernissaq

Naalakkersuisoq aalisarnermik assigiinngitsunik soqutigisalinnik ataatsimeeqateqarniarpoq, siniussami pisassiisarnerit pitsaanerusumik paasinneqatigiinnerullunilu oqaloqatigiissutigisarnissaat pillugit. 

- Aalisarnermut Siunnersuisooqatigiit aamma partiit siulittaasui biologillu siunissami pisassiisarnissat pillugit ataatsimeeqatiginissaannut januaarimi aggersarniarpakka. Ataatsimiinnermi aamma oqaluuserineqassalluni biologit siunnersuutaat qanoq atorneqartassanersut, tamatumani pisassiissutit aamma siunnersuinerit isumaqatigiissutigineqartannginnerinut suna pissutaasarnersoq, Aalisarnermut, Piniarnermut Nunalerinermullu Naalakkersuisoq, Karl-Kristian Kruse tusagassiuutinut nalunaarummi erseqqissaavoq.

Aamma atuaruk Demokraatit: Iluareqqusaarneruvoq

Aamma atuaruk Steen Lynge: Saarullittassanik qaffaaneq siunissami ajornartorsiutinik annertunernik pilersitsiinnassaaq

Amerlineqarneri aasaq iluarineqanngilaq

Karl-Kristian Kruse Inatsisartuni partiit naalakkersuisuutitaqartunit Demokraatinit Atassummiillu ukioq maannamut saarullittassiissutit biologit innersuussutaanniit marloriaammik amerlaneruneri pissutigalugit aasaq isornartorsiorneqarpoq.

Biologit innersuussutaannit 12.379 tonsiusunit maanna saarullittassiissutigineqartut 15.000 tonsinik amerlanerupput.

Aamma atuaruk Kruse: Pisassiissutit pillugit isornartorsiuineq kingusippoq