Kruse: Pisassiissutit pillugit isornartorsiuineq kingusippoq
Partiit naalakkersuisuutitaqartut, Ataassut aamma Demokraatit aalisarnermut naalakkersuisoq, Karl-Kristian Kruse sinerissap qanittuani saarullinnut pisassiissutinik qaffaaneranut isornartorsiuipput.
Aalisakkanullu ukiup tullianimut pisassiisoqalerpat partiit allat suleqatiginiarlugit, Karl-Kristian Kruse oqarpoq.
Isornartorsiutilli maanna takkunnerat, Karl-Kristian Krusep ajuusaarutigaa.
Aamma atuaruk Demokraatit: Iluareqqusaarneruvoq
- Politikkikkut suliaqarnermi aalisagartassiissutit taamatut isornartorsiunerit saqqummiunneqarsimasuugaluarunik ukioq aalisagartassiinerup ingerlanneqarnerani pisimassappat tulluarsimassagaluarpoq, Karl-Kristian Kruse oqarpoq.
Biologit sakkussaqassapput
Demokraatineersoq Randi Vestergaard Evaldsen aamma Atassummeersoq Steen Lynge saarullinnut pisassiissutit qaffanneqarnerannut isornartorsiuisuni nuimanerpaapput.
Aamma atuaruk Steen Lynge: Saarullittassanik qaffaaneq siunissami ajornartorsiutinik annertunernik pilersitsiinnassaaq
Steen Lyngep maanna isornartorsiuinini siunissamut sammitinnerarpaa, biologillu siunnersuinissaminnut sakkussanik amerlanernik aamma tunineqassasut isumaqarluni.
Aalisakkammi pillugit paasissutissat amigarpata, Nunarput isornartorsiorneqariaannaavoq, avammullu tunisineq innarlerneqarsinnaalluni, Steen Lynge oqarpoq.
- Nunanut allanut unammillersinnaassagutta, immitsinnullu illersorsinnaassalluta, taava paasissutissat tigussaasut piginissaat pingaaruteqarpoq. Taamaasilluta Nunarput nukittunerusumik inississinnaaniassammat, Steen Lynge oqarpoq.
Ilaatitsiniartoq
Randi Vestergaard Evaldsen pissarsiarisinnaasimanngilarput, kisianni taanna, Steen Lynge politikerillu allat ukiup tullianut aalisakkanut pisassiissutit suliarineqalerpata sunneeqataasinnaapput.
- Ukiup naajartulernerani 2016-mut aalisagartassiissutit sammilerneqarnerani partiit taakku suleqatigalugit oqaloqatigiinnerit ingerlasussaassapput. Ukioq manna pisassiissutiisimanerput ukiup tulliani qanoq isikkulimmik allannguutitsisoqassappat isikkoqassanersoq, Karl-Kristian Kruse oqarpoq.
Aamma atuaruk Pinngortitaleriffiup innersuussutini aalajangiusimavai