Saarullinnik uumasunik misileraalluni aalisarneq
- Saarullinnik uumasunik aalisarneq juulimili ingerlapparput. ´Saarulliit akunnittarfii´ uummatitsiviupput immamiitinneqartartut, aalisariutillu Leap saarulliit uumasut fire tonsikkaarlugit uummatitsivinniit Maniitsup tunisassiorfianukaattarpai.
- Tunisassiorfimmulli apuunneqannginneranni toqunneqartarput aaviarneqartarlutillu, Sten Sørensen Royal Greenlandimi tunisassiorfinnik ingerlatsinermi ingerlatsisoq oqarpoq.
Misileraalluni aalisarneq 2014-imi juulip aggustillu qaammataanni ingerlanneqarpoq, aalisartullu Maniitsumeersut Maniitsup eqqaani aalisartut saarullinnik uumasunik pilersuisuupput.
Europamiut qisuariaataat utaqqimaarneqarpoq
Nioqqutissiat Aalborgikkoortillugit Europami niuerfimmut nassiunneqartarput, misileraanerullu ingerlasimanerata nalilersorneqarnissaa qanittukkut pissaaq.
- Saarullinnik uumasunik misileraalluni aalisarnerup ingerlarnga pillugu Royal Greenlandip nalilersuinnginnermini Europami atuisartut saarullinnik tunisassiat pitsaassusaannik nalilersuinerat utaqqeqqaarusuppaat.
- Taamaasilluta paasissavarput misileraalluta aalisarnerput ingerlatiinnassaneripput. Tunisassialli pitsaangaarmata isumaqarpugut ingerlatiinnarumaaripput, Sten Sørensen naggasiivoq.
DTU-mi ilinniartup Elvar Traustasonip saarullinnik uumasunik misileraalluni aalisarneq pillugu soraarummeerutigalugu allaatigisaqarpoq.
