Saarulliit suli akikinnerulersinnaapput
Kalaallit aalisartut ukiormanna saarullittassaat 15.000 tonsiupput. Norge-mut Ruslandimullu sanilliukkaanni taakku 2013-mi katillugit 1 million tonsinik saarullittassaqarput. Tamanna kalaallit aalisartortaannik eqquinerlussinnaavoq.
- Aarleqqutigaarput saarulliit akiisa appaqqinnissaat nunarsuarmi niuerfinni saarulliit amerlinerisa kinguneranik, aalisartut piniartullu kattuffianniit KNAPK-miit Tønnes O.K. Berthelsen KNR-imut oqarpoq.
KNAPKp maanna peqataaffigaa atlantikup avannaani aalisarnikkut suleqatigiinneq nutaaq ”Nordatlantiske Maritime Klynge Alliance”, tassanilu sammineqartut ilagaat sakkortunerujartortumik Ruslandimiit unammillerneqarneq. Nunat Norge, Kalaallit Nunaat, Canada, Savalimmiut, Danmark aamma Island suleqatigiinnermi peqataapput.
- Tungitsinniit iliuuserineqarsinnaasut ilagaat aalisakkat suliareqqinneqartarnerisa nukittorsarnissaa aalisakkat nunani allani suliareqqitassatut nassiutiinnarnagit, Tønnes O.K. Berthelsen oqarpoq.
”Nordatlantiske Maritime Klynge Alliance”-mi suleqataaneq aqqutigalugu Islandimiut misilittagaat qissimigaarneqarsinnaapput. Islandimi saarullik tamakkingavillugu tunisassiarineqartarpoq. Oqaatigineqartarpoq aalisakkap 95 procentia Islandimiut atorluartaraat tassa nunatsinni saarullimmik atorluaanermit 20 procent missaliorlugu qaffasinnerusumik.
- Tamatuma kinguneranik saarulliit perlukui 61 millioner koruuninik nalillit igiinnarneqartarput, Arnár Jònsson aalisakkanik atorluaanissamik suleqatigiiffimmi Iceland Ocean Klusterimi suliamut akisussaasoq suleqatigiiffiup nittartagaa malillugu oqarpoq.
Royal Greenland saarullinnik tunisassiornerup pitsanngorsarnissaanut iliuuseqareerpoq tisanerit Maniitsumi aamma Paamiuni ingerlanneqarmata. Tamannali naammanngilaq.
- Islandimiut saarulliit niaqui allallu panertittarpaat. Aamma periarfissaqarpoq saarulliit tiguinik nunatsinni tunisassiornissamut. Kisianni taamatut imminut akilersinnaasumik annertusaaniaraanni aalisakkat tunisassiassat amerlassusaat apeqqutaalluinnartarpoq, Tønnes O.K. Berthelsen oqarpoq.
Nordatlantiske Maritime Klynge Alliance novemberip naalernerani Københavnimi ataatsimeeqqissaaq tassani ilaatigut eqqartorneqassaaq kangianiit unammillerneqarneq.
