Saarulliit avissaartuutsitsilerput

Saarulliit akiisa minnerpaaffeqarnissaanik aalisartut piumasaqaataat KNAPK-imit suliuniutigineqanngimmat, KNAPK immikkut ittumik ataatsimeersuartariaqarpoq, taamatut oqarput Nuummi Aalisartut Piniartullu Peqatigiiffiat.

- KNAPK-p aalisartut massakkut illersorlugit sulinerat malugisinnaannginnakku. Iliuuseqartoqartariaqarpoq, Saxdorph Didriksen oqarpoq.

Saarulliit akiisa minnerpaaffeqalernissaat anguniarlugu oktobarip ulluisa aqqaneq aappaani Nuummi aalisartut 500-t sinnerlugit amerlassuseqartut akerliussutsimik takutitsipput. Taamani KNAPK suliakkerneqarpoq akit minnerpaaffeqarfeqarnissaat anguniassagaa. tamannalu naammassineqarsimanngimmat KNAPK immikkut ittumik ataatsimeersuarnissaa piumasarineqarpoq, Nuummi Aalisartut piniartullu Peqatigiiffianni ilaasortaq Saxtorph Didriksen tamanna pillugu ima oqarpoq:

- Oktobarip 12-iani nuna tamakkerlugu akerliussutsimik takutitsinermi uagutsinnut sunniuteqanngilaq. Aamma sunniuteqarnissaa KNAPK-p maannakkut sulinera taamaaginnassappat ilimagiunnaarakku. Taamaattumik NAPP-p avammut nalunaaruteqarnera ilaasortatut uannut tunngasuummat taanna tapersersorpara, Saxtorp Didriksen oqarpoq imalu nangilluni

- Massakkut pingaarnerpaajuvoq paasitissallugu, KNAPK-p sulinera uagut naammagiunnaarparput. Aalisartunik piniartunillu illersuinera takusinnaanngilarput, NAPP-mi ilaasortaq oqarpoq.

Saxdorph Didriksenip sinerissamiittut allat kajumissaarpai immikkut ittumik ataatsimeersuartitsinissamik kissaateqarnerminni tapersersoqqullutik.