Saammaassisarnissaq kalaallinut naleqqussagaavoq
Pineqaatissinneqarnissaminnik utaqqisut, ukiup aappaata affaa sinnerlugu utaqqereersut aamma sivisunerpaamik qaammatini arfinilinni pineqaatissinneqarsimasunut inissiisarfimmiittussanngorlugit pineqaatissinneqarsimasut, saammaanneqarnissaat siusinnerusukkut inatsiseqarnermut ministeriusup Lars Barfoedip Namminersorlutik Oqartussanut siorna marsimili siunnersuutigaa.
Siunnersuullu taanna maanna inatsiseqarnermut ministerinngortup Morten Bødskovip aalajangiusimavaa, taamaaliornikkut pineqaatissinneqarnissaminnik utaqqisorpassuit iliuuseqarfigineqarsinnaaniassammata.
Kisianni Sara Olsvigip inatsiseqarnermut ministerimut apeqqutigaa, siunnersuut Nunatsinni pissutsinut qanoq tulluartuunerarneqarsinnaanersoq, tassami sakkortuumik pinerluuteqarsimasut aamma inoqatiminnut ulorianaateqartutut isigineqartut, qaammatini arfinilinni pineqaatissinneqarsimasunut inissiisarfimmiittussamnngorlugit pineqaatissinneqarsinnaasarmata.
Morten Bødskovip akissummini erseqqissarpaa, siunnersuut Kalaallit Nunaanni pissutsinut naleqquttuusoq, matumanimi pineqaatissiinerit sivisunerpaamik qaammatinik arfinilinnik sivisussuseqarnissaat piumasaqaataammat.
Aaqqissuussinermi assingusumi, Danmarkimi atuutsinneqalereersumi, qanoq siviutigisumik pineqaatissiisoqarsimanersoq apeqqutaatinneqanngilaq.
Tamatuma saniatigut pineqaatissinneqarsimasoq - saammaanneqassaguni - pineqaatissinneqareernermi kingorna pinerloqqissimassanngilaq, saammaanneqarnermilu kingorna ukiuni marlunni pinerluuteqassanani.
Siunnersuut Inatsisartut upernaaru ataatsimiinnerminni oqaluuserissavaat, maannamulli partiit pineqaatissiisarnermut oqaaseqartartuisa siunnersuut ilalernartinnagu oqaaseqareerput.
