Saamerliit nunarput pillugu isumaqatigeeqaat
Pisortatigoortumik Kalaallit Nunaannut utoqqatsernissaq, atugarliortunut iliuusissat aningaasanut inatsimmut ilanngunnissaat. Qallunaat akiligaannik kalaallit Danmarkimi palaseqalernissaat.
- Assut nuannerpoq oqalliseqataalluni suut tamarmik isumaqatigiiffigineqarfigisaanni, saamerliit Kalaallit Illuutaanni qineqqusaarmata SFip qineqqusaartitaa oqarpoq. Saamerlerniit peqataasut tassaapput Özlem Cekic (SF), Ikram Sawar (S), Pia Boisen (EL) aamma Mette Annelie Rasmussen (R), taakkulu sutigut tamatigut politikkikkut siunnerfitik pillugit isumaqatigiipput.
Unnuup ingerlanerani eqqartorneqarnerit ilagaat kalaallinut suliuniutinut aningaasaliissutit Danmarkimi atugarliortunut iliuusissanut ilanngunneqassasut - tamatumalu allanngortinissaa assut isumaqatigiissutigineqarpoq.
- Aningaasaliissutit ikiligaluttuinnarput taamatullu ingerlasoqaannassappat aarleqqutigaara kalaallinut suliniutit unittoornissaat. Taamaattumik isumaqarpunga pisussaaffigigipput kalaallit ikinnerussuteqartut ikiornissaannut suliniutit aningaasanut inatsimmut ilanngunneqarnissaat, SF-ip qineqqusaartitaa Özlem Sara Cekic oqarpoq.
Oqallinnermut malinnaajartortut 15-it taakkupput taamalu ikitsiginerat oqallinnermi aqutsisup Marianne Jensen uggoraa. Taamaattoq tusarnaariat unnuk naammagisimaarpaat. Taakkulu ilagaat Air Greenlandip tuniniaanermut pisortaq Nini Biilmann.
- Assut tupaallaatigaara qineqqusaartut kalaallit Danmarkimi atugarisaat pillugit piareersarluarsimammata. Aamma nuannerpoq tusarlugu assut ilisimaarineqartoq kalaallit Danmarkimi najugaqartut amerlanersaat inuiaqatigiinni pitsaasumik suleqataasut, tassungalu peqatigitigillugu ikinnerussuteqartut akornanni aamma ikiorneqarnissamik pisariaqartitsisoqartoq, Nini Biilmann oqarpoq.
Sulili qularaa kalaallit Danmarkimiittut atugaat aaqqinneqarumaartut saamerliit naalakkersuisunngussappata.
- Oqalukkaluarput piumassuseqarlutik, kisianni takoqqaarusuppara ilumut aningaasaliisoqassanersoq taamalu qineqqusaarutaannaanngitsoq, Nini Biilmann oqarpoq.
Aatsaat siullermeerutaasumik kalaallit atugaannut tunngatinneqartumik Danmarkimi qineqqusaartoqarpoq.
Københavnimi kalaallit illutaat nalunaarpoq Kristendemokraatit qineqqusaarnermik aaqqissuerusullutik saaffiginnereersimasut taakkulu misissorniaraat tassani talerperliit tamarmik aamma peqataarusussinnaanersut.
