S: Suliffissaaleqisut akileraarutikinnerulernissaq pisariaqartinngilaat

Akileraarutip 1 procentimik Naalakkersuisut aappaagumiit appaaniarnerat, Siumup siulittaasuata akisussaassuseqannginnertut isigaa.

Akileraarutit appartinneqarnissaat ajoqutissaqartinngilarput. Taamaaliortoqarneratigulli tamanna allanut tutsinneqassanngilaq. Akileraarut appartinneqassappat tamanna akissaqartinneqartariaqarpoq, taamaaliornerup kusannassusaa piinnarnagu, Aleqa Hammond oqarpoq.

- Piviusut aallaavigineqartariaqarput, tassami pisussaaffigaarput inuiaqatigiit sulerusuttut suliffissaqartinnissaat, tamannalu aqqutissiuuteqqaartariaqarpoq. Tassami atugarissaarneq tassuunaqquummat. Inuiaqatigiit namminneq pisinnaasut pilerittariaqarpavut.

-Taamaattumik isumaqarpunga, ukioq qinersivissaq eqqorlugu akileraarutip appartinneqarnissaa akisussaassuseqanngitsuliornerusoq, Aleqa Hammond oqarpoq.

Aningaasaqarnermut Naalakkersuisup, Maliina Abelsenip  maannamut suli ilisimaqqissaanngilaa, 1 procentimik qaffaanerup kinguneranit Nunatta Karsiata aningaasat annaasassaat 70 million koruuniusut suminngaanniit aaneqassanersut.

Taamaattorli pappialat nalillit, soorlu obligationit akitsuuserneqarnerisigut matussusiisinnaaneq eqqarsaatigineqartoq oqaatigalugu.

Siumulli siulittaasuata upperinngilaa, 70 million koruunit pappialanit nalilinnit aaneqarsinnaanersut.

- Qilanaarissavarput takussitissalimmik Naalakkersuisut apuussinissaat, taama iliussappata. Ilimaginngilara 70 million koruunit pappialanit nalilinnit aaneqarsinnaassasut. Takussavarpulli Naalakkersuisut taama oqarnertik qanoq pimoorutigineraat.

1 procentimik appaaniarnerup siunertaraa, sulerusussuseqalerneq, Maliina Abelsen taama ippassaani oqarpoq. Tamannali Aleqa Hammondip upperinngilaa.

- Nunatta oqaluttuarisaanerani suliffissaaleqineq aatsaat taama qaffasitsigaaq. Tamanna Naalakkersuisut appartittariaqarpaat, taamaaliornikkut Oqartussanit pilersugassat ikinnerpaalersinneqassammata. Oqartussat pilersortagaat ukiut tamaasa 500-nik amerlisarput. Taamaattumik Naalakkersuisut suliffissaqartitsisariaqarput, akileraarut appaannarnagu.

Aleqa Hammondip ilanngullugu oqaatigaa, nunat allamiunik sulisoqartarneq Naalakkersuisunit qanoq iliuuseqarfigineqartariaqartoq, tassami taakkuummata nunaqavissut suliffissaaleqinerinut pissutaaqataasut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat