Sisimiuni Nalunnguarfik naasupiluiarneqartoq
Sisimiuni taseq, Nalunnguarfik, naasupilunnik naaffigineqarluni kusanarunnaaraluttuinnarmat sisimiormiut nammineq piumassutsiminnik juulip 23-ani salillugu aallartippaat.
Saliinissamut isumassarsisoq Marius Olsen tamanna pillugu ima oqarpoq, - tassa saliivugut pissutigalugu aamma Nalunnguarfik sumorujussuaq atorneqarsinnaammat. Sunngiffimmi taavalu aamma aasami.taamatullu aamma siornaakkunni aqqusinniornikuuaat, aqqusineerannguamik aamma illoqarfimmiut kajumissutsiminnik, pisuinnarnut pisuttuarfiusinnaasunngorlugu taanna taseq kaajallallugu. Asanninnerullu aqqutaanik taallugu, Olsen oqarpoq
Kuuk paqqersimavoq
Nalunnguarfik siornatigut kooqarsimavoq kuukkunnaaramilu naasupilunnik naaffigineqartalersimavoq.
- Taanna siullermik kuuk kuuttuugaluarpoq. Imeqarfimmiit kooqaraluarpoq. Kuua taanna kuugunnaartitaanikuuvoq taavalu silaannalersorunnaarnikuulluni. Taamaaligamilu tassa paqqeriartuaarluni naajorarluni tippakkiartorusaaginnalernikuuvoq, Marius Olsen oqarpoq.
Video: Daniel L. Johnsen
Qeqqata Kommuniani teknikkeqarnermut ataatsimiisitaliap siulittaasua, Frederik Olsen, naapertorlugu Sisimiuni tatsit ilaat, Nilliasup tasia, Nalunnguarfimmut kooqarsimagaluartoq imaarukkiartulersimavoq, taamaalilluni Nalunnguarfiup Tasianut kooqarsinnaanera ajornarsiartorsimalluni.
- Kisianni tassa tamakkua tamaasa oqaluuseriniarpagut. Qanoruna ililluta immersorteqqilerniaripput? Qanoruna ililluta kuutseqqilerniaripput? Sumununa atorniaripput? Marius Olsen oqarpoq
Nalunnguarfimmi ilaatigut aamma nammineq piumassutsiminnit suliaqartunit ukiualuit matuma siorna kaajallallugu pisuttarfiliorneqarsimavoq, Sisimiunilu kulturikkut illorsuup saavaniimmat atorluarneqarsinnaanera eqqarsaatersuutigineqarpoq.
- Ilaatigut immaqa umiatsianngulersinnaavarput. Iputtarissanik. Taamatullu aamma vandcykel-it tassani atorneqarsinnaalissapput. Tassami kulturhusitta saaniikkami tamakkununnga aamma naleqqulluinnarpoq, Marius Olsen oqarpoq.
Nalunnguarfimmi saliisut maannamut ullut arfinillit atorlugit saleereersimalerput, saleeqataasullu agguaqatigiisillugu akunnerit 30-t saliisimasut suleqataasunit tagginneqarpoq.
Namminneq piumassutsiminnik suliniuteqartut ataatsimiititaliamit tapersorneqarput
Qeqqata Kommuunianiillu Nalunnguarfik qangatut uumassuseqalernissaanut suliniuteqartut teknikkimut ataatsimiititaliamit tapersersorlugillu suleqataaffigineqarusupput.
Tallimanngornermi aggustip ulluisa aappaani Nalunnguarmik naggammik saliisoqarpoq,kingornalu nalilersuisoqassaaq saliineq ingerlateqqinnqeassanersoq aamma Nalunnguarifk pillugu peqatigiiffimmik pilersitsisoqassanersoq.
