Nunarsuarmi anguniakkat Avannaata Kommunianut ineriartortitsissutaassasut
Piitsoqarunnaarsitsineq, imaani uumasut akisussaassuseqartunik atuineq nioqqutissiornerlu. Taakku Naalagaaffiit Peqatigiit nunarsuarmut anguniagaannut 17-inut ilaapput, anguniakkallu Avannaata Kommunianit komuniminik attanneqarsinnaasumik ineriartortitsinermini malinniarpaat.
- Ukiut sisamat qaangiuppata mittarfittaartussaavugut. Inuiaqatigiinni inooriaaseq allanngortussaavoq taamaattumik kommunip pilersaarutai ukiunut qulinut 20-nut eqqarsaatigalugit anguniagaani pingaartissimavarput FN-ip nammaqatigiittumik anguniagai pilersaarusiornitsinnut ilanngutissallugit, borgmester Palle Jerimiassen oqarpoq.
AAMMA ATUARUK Suliniut nutaaq: Tasiilami suleqatigiippugut
Sulisunik septembarip ulluisa 23-anni isumasioqatigiisitsisoqarmat, Naalagaaffiit Peqatigiit attanneqarsinnaasumik ineriartortitsinermi anguniagaat atorlugit suliaqalerput. Nunarsuarmi anguniakkat kommunalbestyrelsip kommunimik ukiunut qulinit 20-nut qanoq ineriartortitsinissaanut pilersaarusiornermut periusissiai atorneqassapput.
Anguniakkat assersuutigalugu kommunimi inuussutissarsiornerni pingaarnerpaamut tassa piniarnermut aalisarnermullu atatillugu atuutilersissinnaasut, borgmesteri oqarpoq.
- Kommunitsinni nammaqatigiinneq isigissagutsigu immaqa aalisarneq, piniarneq inuussutissarsiutitut pingaarnerpaatut qiviarneqarsinnaavoq, tassani pisassat, aalisarnermi atortut, piniarnermi atortut, piniagassat killilersorneqarnerannut tunngasut tamakkununnga tunngatillugu nammaqatigiittumik ingerlaneq immaqa pingaaruteqarpoq kommunitsinnut ingerlatissallugu siunissarput eqqarsaatigalugu, Palle Jerimiassen oqarpoq.
Innuttaasut peqataatinneqassasut
Sulinerup immikkoortuani siullermi kommunimi sulisut nunarsuarmi anguniakkanik ilinniassapput. Taava ilikkakkatik innuttaasunik aappagumit oqaloqateqartarnissaminnut toqqammavigissavaat.
AAMMA ATUARUK Royal Greenland Naalagaaffit Peqatigiit anguniagaat tunngavigalugit pilersaarusiukkamik ingerlatsiniartoq
Anguniakkanilu sorliit kommunimik ineriartortitsinissamut naleqqunnerunersut ataatsimut paasiniarneqarsinnaaniassammat, kommunimi tamarmi innuttaasut nunarsuarmi anguniakkanut ilisimannilluarnissaat pingaaruteqartoq borgmesteri isumaqarpoq.
Sulisullu isorinnikujoqqaaraluartut suliniut aallartilluartoq, Palle Jerimiassen isumaqarpoq.
- Immaqa aallaqqaammut saqqummiunneqaqqaarmata tupapput, kisianni ulloq kingulleq tappikani akornanni apersullattaarlugit paasivara paasilersimagaat qanoq imminut, sunut tamanut sulinermut ataqatigiinnersut, anguniakkat, siunissamilu pilersaarutit imminnut qanoq taakku sakkut atorlugit qanoq ataqatigiissinnaaneranut soqutiginnillutillu peqataalersimasut, peqataalluarput aamma soqutiginnipput.
Naalakkersuisut nunarsuarmi anguniakkat misissoraat
Naalagaaffiit Peqatigiillu nunarsuarmi angunigaannik misissuisut kommuniinnaanngillat. Naalakkersuisut nunarsuarmi anguniakkat nunarpullu pillugi nalunaarusiamik Inatsisartunut ukiaq manna saqqummiussiniartut Avannaata Kommunianit tusagassiuutinut nalunaarummi allaaseraat.
