Royal Greenland Naalagaaffit Peqatigiit anguniagaat tunngavigalugit pilersaarusiukkamik ingerlatsiniartoq
Royal Greenland suliffeqarfiit ingerlatsinerannik Naalagaaffiit Peqatigiit nunarsuarmi piujuartitsinermik ineriartortitsineq pillugu 2030 qaangiutsinnagu anguniagaat 17-iusut tunngavigalugit patajaallisaanermut iluaqutaasussamik suliniummut Danmarkimi suliffeqarfiit 20-t peqatigalugit ingerlatseqataavoq.
Royal Greenlandip suliniummik “Ajunngitsuliornermit niuernermik ingerlatsinermut”-mik qulequtsikkamik ingerlatseqataanermigut CSR tunngavigalugu piujuartitsinermut tunngasunik aallussaqarnerulernissaminut periarfissaqalerpoq, suliffeqarfissuarmi Royal Greenlandimi avatangiisilerinermi ingerlatsisoq Lisbeth Due Schönemann-Paul Royal Greenlandip nittartagaanut taama oqarpoq.
Suliffeqarfiit nunarsuarmi kikkulluunniit iluaqutigisinnaasaannik piujuartitsineq tunngavigalugu nutaanik ineriartortitsinissaminnut isumassarsitinneqartarnissaat kajumissaarneqartarnissaallu suliniummi siunertaavoq.
- Nunarsuarmi suliffeqarfinni aalisarnermik tunisassiornermillu aallussaqartuni siuttut ilagaatigut, taamatuttaaq piujuartitsineq tunngavigalugu aallussinerput siunissami aamma tusaamaneqarluaatigerusupparput, Lisbeth Due Schönemann-Paul oqarpoq.
Suliniummi ukiuni marlunni ingerlanneqartussami peqataasut suliffeqarfinnersuut katerisimaartassapput, aamma attaveqaqatigiinnikkut atassuteqaqatigiinnikkullu siunissami niuernermik ingerlatsinermi tunngavigineqartartussanik piujuartitsineq tunngavigalugu niuernermut najoqqutassanik ineriartortitsisassapput.
Suliniut “Ajunngitsuliornermit niuernermik ingerlatsinermut” apriilimi 2018-imi aallarnerneqartoq novembarimi 2019-imi inaarsarneqassaaq.
Nunarsuarmi anguniakkat 17-iusut, anguniakkat ilaat 169-iusut takussutissiallu uunga alakkarneqarsinnaapput.
