Russit uuliaataata akisunerpaaffilernissaanut nunat G7-t Australialu tapersiisut
Nunarsuarmi nunat pisuujunerpaat russit uuliaataannik pisinissamut akimik annerpaaffiliipput. Russit uuliamik tunisassiornerminnit isertitatik Ukrainemut sorsunnerminnut aningaasaliissutigisarpaat.
Nunat G7-tut taaneqartartut Australialu isumaqatigiipput russit uuliaataata nappartamut akiata 60 dollarsit qaangissanngikkai.Tamannalu nunat EU-mut ilaasortaasut aamma isumaqatigiissutigaat. Nunat G7-t unnuaq nalunaarput taamaalilluni russit uuliamik tunisassiaat nappartamut 60 dollarsit qaangernagit akilik kisimi pisiarineqartalissasoq.
Nunat G7-t tassapput nunat arfineq marluk nunarsuarmi pisujunerpaat Canada, Frankrig, Tyskland, Italia, Japan, Tuluit Nunaat USA-lu. EU taakkunani aamma sinniisoqarpoq.
Nunat taakkua G8-ngallarmata russit ilaasortaasimappput, sorsunneralli peqqutigalugu anisitaammata nunat G7-nngorput.
Russit uuliamit iluanaaruteqarnerat annikillisarniarlugu nunarsuarmilu uuliamik pilersuineq aalakaanerutinniarlugu akit qaffasinnerpaaffilerneqarput.
Nunat G7-t Australialu nalunaarput akimik qaffasinnerpaaffiliineq russit uuliamit iluanaarutimik sorsunnerminnut atuinerannut unitsitsiniarluni nunarsuarmi nukissiuutinik pilersuinermi akit aalakaanerunissaannik siunertaqartoq.
Nunat EU-mut ilaasortaasut ippassaq nalunaarutigaat russit uuliamik tunisassiaannut annerpaamik nappartamut 60 dollarseqartitsinissaq aqagu sapaammi EU aalajangiunneqassasoq.
Ingerlatseqatigiiffimmi Goldman Sachsimi misissueqqissaartartut naliliipput uuliamik taamatut akeqartitsiniarneq russit akiniaanerannik kinguneqarnavianngitsoq iluatsinnissaali aamma qularnartoq.
Tysland, Holland Danmarkilu qulartunut ilaapput, EU-p russit uuliaataata akianut aalajangersaaniassappata tamatuma russit allanut tunitsivissarsiulernerannik kinguneqarnissaa ernummatigisariaqarnerpaat.
