Russit naalakkersuisuisa killitsissiat Navalnyjimut toqunartutortitsisimannginneraraat
Rusland illuatungiliuttup Aleksej Navalnyjip ukiup matuma aallartilaarnerani toqunartutortitaaneranut pisuunnginneraqqippoq.
Nunani assigiinngitsuni tusagassiorfissuit qulaajaareerlutik Ruslandip isertortumik paasiniaasartuineersunik, tassa FSB-imeersunik pisuutitsinerisa kingorna taama nalunaarput.
Toqunartutortitsinatilli Ruslandip nunanut allanut ministeria, Sergej Lavrov, pingasunngormat oqarpoq.
- Nutaarsiassat makku illarnarput. Nutaarsiassalli saqqummiunneqarnera ataasiinnarmik takutitsivoq. Nunat killiit ileqqorissaarnermut malittarisassanik amigaateqarput, Lavrov taama oqartoq nutaarsiassaqartitsivik AFP allappoq.
AAMMA ATUARUK Navalnyj russit killitsissiaannit toqoriarneqarsimanerartoq
Navalnyjili FSB-imiit ukiorpassuarni malersorneqarsimasoq nutaarsiassaqartitsiviit soorlu amerikamiut tv-eqarfiata CNN-ip, tyskit atuagassiaata Der Spiegelip tusagassiorfiullu qulaajaasartup Bellingcat qulaajaanerisa takutippaat.
Tusagassiorfiillu misissuinerminni mobildatamut isersinnaasimapput. Taamalu misissuinerminni inuit Navalnyjimut toqunartutortitsisimasutut pasisaminnik kinaassusersipput.
