Navalnyj russit killitsissiaannit toqoriarneqarsimanerartoq
![](/sites/default/files/styles/image_934x467/public/article_images/20201001-114300-l-1920x1440we.jpg?itok=hxYGKL0r)
Russit naalakkersuisuinut illuatungiliuttut siuttuat, Aleksej Navalnyj, kimit ukioq manna siusinnerusukkut toqunartutortinneqarsimanersoq maanna paasinarsivoq.
Russit naalagaaffiata isertortumik paasiniaasartui taamaaleriaraluarsimasutut, nunarsuaq tamakkerlugu tusagassiuutit misissuineranni tikkuarneqarpoq.
Angut taanna ukiorpassuarni taakkunani malersorneqarpoq, tamanna tv-qarfimmit CNN-imi ilanngutassiarineqarsimasunit, tyskit aviisianni Der Spiegelimi aamma itisiliillutik misissuisartut Bellingcatip ilanngutassiaanni takuneqarsinnaavoq.
AAMMA ATUARUK Navalnyj: Novichokimik attugaqartitaanikkut toqunartutortitaavunga
Tusagassiorfiit taakku ilaatigut mobiilimi paasissutissanut iserlutik paasiniaasinnaanerminnik periarfissinneqaramik, paasissutissat amerlasuut katersorneqarput. Misissuinermilu Navalnyjimut kikkut toqunartutortitsimanersut atersineqarsinnaasimallutik.
Navalnyj oqarnera naapertorlugu, paasissutissat tamakku tamaasa inuttaminit katersorneqarsimapput, tusagassiuutinullu ingerlateqqinneqarlutik. Maannalu suliaq naammassineqartoq taakku naqissusiipput.
- Nalunngilara kia toqoriaraluarneraanga. Nalunngilakka sumi najugaqarnersut. Nalunngilara sumi sulinersut. Ativii nalunngilakka. Aterinngisartillu ilisarnaatitut taaguutaat nalunngilakka. Assiutigaakka, Navalnyj videoliamini taama oqarpoq.