Russit kilisaataat Norgemi Tromsømi ikuallattoq uuliakoortoq

Russit kilisaataat Norgemi Tromsømi ikuallattoq maanna uuliakoorpoq. Ritzau taama allaaserisaqarpoq.

Kilisaat, Bukhta Naezdik Breivikami talinngasoq nalunaaqutaq 9.15 uerujussuarpoq, umiarsuullu annersaa immap iluaniilerluni.

Ikuallaneq aallartimmat kilisaat dieselimik 200.000 literimik useqarsimavoq.

Kilisaat maaanna uuliakoorpoq. Uuliakoornerata qanoq annertutiginera Norgemi oqartussanit sisamanngornermi ualikkut aatsaat oqarseqarfigineqarsinnaavoq.

Sinerissami upalungaarsimasut mingutsitsinermut killiliiniarsaripput uulialu anisimasoq qallorniarlugu piareersarlutik.

AAMMA ATUARUK Russit kilisaataat Tromsømi ikuallattoq

- Qanoq annertutigisumik ajoqusiisinnaanerata oqaatiginissaa siusippallaarpoq, Norgep sineriaani upalungaarsimasut pigaartuisa pisortaat, Steinar Gyltnes oqarpoq.

- Imaanut uuliakoortoqartillugu avatangiisinut innarliisoqartuaannarpoq, Steinar Gyltnes oqarpoq.

Kilisaammit ikuallattumit 300 meterinit ungasitsigisumi najugaqartut tamarmik qimagussortinneqassasut politiinspektørip pingasunngornermi unnukkut aqqanermut inassutigaa.

Innuttaasut 92-it qimagussortinneqarput, sumiiffiullu orneqqusaannginnera oqartussanit sisamanngornermi ualikkut orninneqaqqissinnaalersinneqarpoq. Aamma kilisaatip qaarataratarsinnaanera pissutigalugu aqquserngit matuneqarsimapput.

Kilisaat 64 meterinik takissuseqarpoq 13 meterimillu silissuseqarluni. Kilisaatip ikuallalernerani inuttat 29-t kilisaammiissimapput. Taakkunannga aqqaneq-marluk pujorneranit ajoqusersimanertik pissutigalugu napparsimmaviliaanneqarput.