Ruslandimi naalakkersuisunut illuatungiliuttoq suli peruluttoq

Ruslandimi naalakkersuisunut illuatungiliuttoq Aleksej Navalnyj suli peruluppoq sulilu sinitsinneqarluni. Oqaaseqartitaa Kira Jarmysj taama ilisimatitsivoq.

Navalnyj Berlinimi napparsimmavimmi uninngavoq.

44-nik ukiulik Navalnyj, Ruslandip præsidentianik Vladimir Putinimik isornartorsiuisut akornanni nuimasoq toqunartutortinneqarsimasoq, tapersersortaasa oqaatigaat. Sibiriami qineqqusaaqqammerluni timmisartorluni sapaatit akunnerata siuliani angerlariartulerluni iluaallerpoq.

Navalnyj arfininngormat Berliniliaanneqarpoq, Berlinip universitetiata napparsimmaviani katsorsartikkiarluni.

Navalnyj toqunartutortinneqarsimagunartoq, Tysklandip forbundskansleriata Angela Merkelip oqaaseqartitaata Steffen Seibertip oqaatigaa.

- Navalnyj-p toqunartutortinneqarsimanera pasilliutigineqarpoq, siusinnerusukkummi taamaaliortoqarsimaneranik takussutissaqarpoq, Seibert oqarpoq.

AAMMA ATUARUK Putinimut iluatungiliuttoq Navalnyjs toqusimasinnaagaluartoq

Tamannali ilumuunngitsoq, Ruslandimi naalakkersuisut Kremlimit oqaatigaat.

EU-p nunanut allanut tunngasunut qullersaa Josep Borrell oqaaseqaateqarpoq, Navalnyj-p toqunartutortinneqarsimanerarneqarnera Ruslandimi oqartussat iternga tikillugu misissussagaat kaammattuutigalugu.

Illuatungiliuttoq Aleksej Navalnyj sooq napparsimalersimanersoq misissorneqaleruttortoq, Ruslandip nunamut namminermut ministereqarfiata sisamanngornermi nalunaarutigaa.