Ruslandip OL-imut peqataasinnaajunnaarnini suliareqqitassanngortikkaa
Ruslandip nukkassaatinik atuinermut akiuiniaqatigiiffianni, Rusadami, qullersaata Yuri Ganusip nutaarsiassaqartitsivimmut DPA-mut ilisimatitsissutigaa maalaarut tallimanngornermi nassiussimallugu.
Ruslandip OL-imut ukiuni tulliuttuni sisamani peqataasinnaajunnaarsinneqarnerata maalaarutigineqarnissaa iluaqutaanavianngitsoq, Ganusip siusinnerusukkut oqaatigereerpaa, aalajangiinerummi eqqartuussivimmi allanngortinneqarsinnaanissaa ilimanaateqannginneraramiuk.
Nunalli tamalaat nukkassaatinik atuinermut akiuiniaqatigiiffiata Wadap aalajangiinerata eqqartuussivimmit sukannerpallaarunnaarsinneqarsinnaanissaa neriuutigalugu, Ruslandip OL-imut ataatsimiititaliaata eqqartuussivimmut sapaatit akunnerata massuma ingerlanerani suliareqqitassanngortinneqarnissaa aalajangerpaa.
Ruslandimiut Wadap aalajangiineranut illuatungiliunnertik taamaaliorlutik takutinniarpaat. Ruslandimmi timersornermut tunngasunut oqartussaasui isumaqarput taama aalajangiineq Ruslandimik politikkikkut malersuiniarnerusoq.
Ruslandimiut nukkassaatinik atuisoqarsimaneranut atatillugu paasissutissanik piaaralutik allanngortitsisimasutut Wadamit aalajangiiffigineqarput, Ruslandimiullu nunani tamalaani timersornernut peqataasinnaajunnaarsinneqarlutik.
Ruslandimi timersortartut oqartussat aqutaannik nukkassaatitortinneqartartutut nalunaarusiatigut 2015-imi aalajangiiffigineqarput.
Timersortartut Ruslandimeersut Rio de Janeiromi Pyeongchangimilu OL-ertoqarneranni kingorna peqataasinnaajunnaarsinneqarput, timersortartulli 169-it nunamut aalajangersimasumut tunuliaquteqaratik unammiuaarnernut peqataasinnaatitaapput.
00:02:27
/ritzau/
