Ruslandip Europamut gas-imik pilersuinerminik unitsitsinissani aarlerisaarutigaa
Nunarsuarmi nunat killiit qanittukkut uuliap akianut nappartamut 300 dollarsinik akiliisalernissartik immaqalu gasip aqqutaata Nord Stream 1-ip matuneqarnissaa isummerfigisariaqarpaat.
Ataasinngormat russit tv-anni Ruslandip ministeriuneranut tullersortaasoq Alexander Novak oqarpoq.
Taamatut eqqarsarnerup piviusunngorsinnaanera aarlerisaarutigaa EUp USA-llu russit uuliaannik pisinissaq inerteqqutigissappassuk.
- Aalajangersimalluinnarpoq russit uuliaannikitigartitsineq ajorluinnartorsuarnik kinguneqassammat, Novak oqarpoq.
- Akit qaffakkiartornerat siumungaaq eqqoriarneqarsinnaanngillat. Akit nappartamut 300 dollars angusinnaavaat, annerunngikkunik.
Taamatut nalunaaruteqartoqarpoq uuliap akia ataasinngormat 2008-p kingornatigut aatsaat taama qaffasitsigilermat nappartamut 140 dollars-ip missaaniilerluni..
Ulloq taanna USAp nunanut allanut ministeriata Antony Blinken-ip aarlerisaarutigaa Washington-ip iliisalu russit uuliaannik oisinissaq inerteqqutiginiarlugu eqqarsatigigaat.
Alexander Novak naapertorlugu Europap Ruslandimit uuliamik pisartakkami taartissaanik nassaarniarluni ukioq ataaseq atortariaqarpaa, tamatumalu akit qaffannerujussui kingunerissavaa.
- Europamiut politikerii ilumoortariaqarput innuttatillu aamma atuisut qanoq ilimagisaqarnissannik ilimasaartariaqarlugit, Novak oqarpoq.
Nord Stream 1 – ruujorersuaq gas-imut aqqut 1225 kilometerinik takissuseqarpoq immallu Østersøp naqqatigoorluni Ruslandimiit Tysklandimut ingerlalluni.
Taamaalilluni gas-imik Europap atorfissaqartitaata 40 procentia Rusland-ip nioqqutigisarpaa.