Ruslandi sikunik aserorterutinik amerlanerusunik atorfissaqartitsisoq
Sikunik aserorterutit atomip nukinganik atuisuussapput, Ruslandillu Issittortaata imartaanik nakkutilliinermut atorneqassallutik. Stanislav Golovinsky, Ruslandip ineriartortitsinermut aqutsisoqarfiata pisortamut tullersortaa, Arctic-2017-imik taallugu nunat tamalaat Moskvami ataatsimeersuarneranni taama oqarpoq.
- Sikunik aserorterutit amerlineqartariaqarput. Umiarsuit sikunik aserorterutit pingasut, atomip nukinganik atuisut, Arktika, Sibir Uralilu, sanaartorneqalereerput. Sikunillu aserorterummik sisammiillutalu tallimmiisariaqassaagut, Golovinsky oqarpoq.
Allaaserisaq uani takujuk: Arctic.ru.
Issittumi suliniutinik annertuunik amerlasuunik aallartitsisoqarsimasoq, suliniutillu tamakku tamakkiisumik 2020'kkunni piviusunngortinneqarsimassasut, tamannalu ilaatigut pissutigalugu umiarsuarnik sikunik aserorterutaasunik amerlanerusunik peqalernissaq pisariaqalissasoq, Ruslandimi nunap immikkoortuini aningaasarsiornermik ineriartortitsinermik aqutsisoqarfiup pisortaata tullia, Dmitry Fishkin oqarpoq.
