Rusland pissutigalugu illersornissaqarfik upalungaarsimanerulerpoq

Danmarkimi illersornissaqarfiup upalungaarsimanerunissaa Danmarkimi Illersornissaqarfiup Aqutsisoqarfiata kaammattuutigereeraalu illersornissaqarfiup upalungaarsimanerulernissaa Danmarkimi naalakkersuisut aalajangerpaat.

Ruslandip sakkutuulersornikkut Ukrainemik sioorasaarinera matumani pissutaasoq illersornissamut ministereqarfiup tusagassiutinut nalunaarummi oqaatigaa.

Suliniutinut ilaavoq danskit sakkutuuisa bataljonit upalungarsimasussat Natop upalungaarsimasuutitaanut ilaasut ullunut 1-imiit ullunut 5-nut piareersimanissaat sivikillisinneqarpoq. Tassa imaappoq sakkutooqatigiit bataljonit ullut 1-5 ingerlaneranni aallarsinnaassasut.

Sakkutooqatigiit bataljonit Slagelsemi katersorneqassapput, toqqortallu pisariaqartut pilersinneqassapput.

Bornholmimi timmisartut sorsuutit

Illersornissaqarfiup saniatigut naalagaaffiup upalungaarsimanerulernissaanut timmisartut sorsuutit F-16-it marluk Bornholmimi inissinniarpai, suliniummut pisariaqarnissaa nalilerneqarpat.

Siornatigut taama pisoqartareerpoq, danskit silannarmut oqartuussaaffianut russit timmisartui qanillivallaaraangata. 

AAMMA ATUARUK Ukraine eqqisseqatigiikkusuppoq

Rusland Ukrainemut killeqarfiup nalaanut sakkutuunik tuusintilikkuutaanik piffissami kingullermi inissiisimavoq, illersornissaqarfillu upalungaarsimatinneqalerluni.

Ruslandip Ukrainemik saassussisinnaaneranik ernumalersitsivoq.

Assut nalinginnaanngitsuuvoq 

Marlunngormat ministeriunerup Mette Frederiksenip (S) norgemiu Jens Stoltenberg, Natop generalsekretæria, ataatsimeeqatigaa. Kangia’tungaani najummassimanartorsiorneq pillugu ataatsimiipput.

- Ukrainemi eqqaanilu pisoq ilumoorsaarnartoq taamaattumillu ullaaq manna Natop generalsekretærianik Jens Stoltenbergimik oqaloqatigiinneq ilumoorsaartoq, Facebookimi Frederiksen allappoq.

Danmarkip illersornissaqarfiata sakkutuunik upalungaarsimatitaqalernera pissutsit najummassimanarsinerannut takussutissaavoq.

Københavnip Universitetiani Institut for Statskundskabimi professori Mikkel Vedby Rasmussen taama oqarpoq. Danmarkip illersornissakkut polikkia pillugu taanna ilaatigut ilisimatusarsimavoq.

- Tamanna nalinginnaanngitsuuvoq, Europallu kangiani pisut pillugit naalakkersuisut illersornissaqarfiullu ernumassuteqarnerannik takussutissaalluni. Sorsunnerup nillertup naaneraniilli Danmarkimi sakkutuut upalungaarsimatinneqalersimanerannik aatsaat takulerpunga, Mikkel Vedby Rasmussen nutaarsiassaqartitsivimmut Ritzauimut oqarpoq.

Ruslandip Ukrainemik saassussinialersaannginnini nammineq oqaatigiuarsimavaa.