Ukraine eqqisseqatigiikkusuppoq

Ukraine suli isumaqarpoq, nunamut sanilerisaminnut Ruslandimut aaqqiagiinngissuteqarnertik eqqisseqatigiinnermik inerneqarsinnaagaluartoq.

Ukrainemiut præsidentianut siunnersorti Mykhajlo Podoljak taama oqarsimanerarneqarpoq.

- Imminut ilumoorfigaluni pissusiviusumik naliliineq, oqimaalutaarilluarluni silatusaartumik aaqqiinissamik pilersitsisarpoq, pisut ajornerulersinngikkaluarlugit, taanna oqarpoq.

Ukrainep Ruslandillu akunnerminni aaqqiagiinnginnerat nunanit kippasinnerusumiittunit maluginiarneqartupilussuanngorpoq, aarleqqutigineqarporlu Russit Ukraine tiguarniarsarilersinnaagaa.

Sakkutoorpassuit 1000-likkaat killeqarfimmiipput

Ruslandip sakkutuut 100.000-t sinneqartut Ukrainep killeqarfiata sineriaanut katersuutsippai.

USA-miillu ippassaq arfininngormat oqaatigineqarpoq, Ruslandip sakkutuui Ukrainep killeqarfianiittut maanna 70 procentiusut, tassa saassussisoqassagaluarpat saassussisoqarnissaanut sakkutuut naammalluartut piareersimatinneqarput.

Russillu sakkulersorniarlutik piniinnassappata, februaarip qeqqata missaani sakkutuut 150.000-t missaannik amerlineqarsinnaasut, USA naliliivoq.

Ukrainemiullu naalakkersuisui naapertorlugit russit taamatut pinerat Ukrainemiunit ima paasineqarpoq: "Russit qunutitsiniarlutik tarnikkut sakkortuumik ilungersuatitsiniarsarisut".

- Naalagaaffitsinni isertortumik paasiniaasugut sakkutuuttalu tungaaniit russit iliuuserisaat tupaallaataanngilluinnarpoq, taakku oqarput. 

Jannuaarip ingerlanerani russit naalagaaffiata siuttui qaffasinnerpaat, USA aammalu Nato pissutsit ilungersunarsinerat pillugu oqaloqatigiikkaluarput pissanganartorsiornermilli qasukkaamititsinngillat

Ruslandip qangali piumasaraa Ukraine Natomi illersornissaq pillugu iligiinnut ilanngutsinneqassanngitsoq, taakkulu piumasaat manna tikillugu akuersaarneqanngilluinnarpoq.