Rune Kilden Katuami oqalugiassaaq
Rune Kilden inuuvoq eqeersimaartupilussuaq, suliffeqarfiutiminik ingerlatsinermi saniatigut siulersuisuni arlalinni ilaasortaaffeqartoq. Tamakkulu tamaasa assigiissutigisaat tassaavoq nutaanik pilersitsiviummata, tamannalu Rune Kildenip ilisimasaqarfigisupilussuuaa.
-Nammineq oqaluttuassartara suliniutillu peqataaffigisimasakka oqaluttuarissavakka, soorlu assersuutigalugu Aarhusimi umiarsualiviani Lighthouse aamma Pakhus 2013. Aammattaaq Aarhus citymi Scandicip akunnittarfia oqaluttuarissavara, taannami akunnittarfissatut ininik 230-inik inuillu 500-t missaat ataatsimiittarfigisassaattut ineriartortinneqarpoq, Rune Kilden knr.gl-imut oqarpoq.
Ualerlu manna Katuamut tusarnaariat aamma Rune Kildenip suliarisartagaanik suleriaaserisartagaanillu tusagaqarnissaminnut nutaaliornermillu suleriaatsit pillugit paasisaqarnerunissaminnut periarfissaqassapput.
-Suliniutinik inerisaanermi allaanerusumik nutaaliornissamillu suleriaasera oqaluttuarilaassavara. Suliffeqarfinnik nutaanik inerisaanermik suliaqarninni nutaaliornikkut suleriaatsit atugarisarpakka. Nioqqutissiuinnarnissaq siunertarineq ajorpara. Inuit peqataaffigerusutaannik pilersitsisoqartariaqarpoq. Taamatut suleriaaseqarnikkut aningaasarsiornikkut ilungersunartorsiortoqaraluartoq suliniutinik angisuunik piviusunngortitsisinnaasimavunga, Rune Kilden oqaluttuarpoq.