Rubinit nunatsinneersut USA-mi nittarsaanneqalersut
Ullumikkut ujaqqat kusanartut suliffissuarni pilersinneqartarput, pinngortitamilu ujaqqanik erlinnartunik nassaarfiusinnaasut Kalaallit Nunaat nunat ikittut akornanniippoq.
Annikitsumik aatsitassarsiortup USA-mi ujaqqanut takutitsinissarsuarmut neriuuteqarpoq.
- Neriuutiginerpaavara takanunngarutta allanut attaveqalernissarput ujaqqerisunik. Taavalu immitsinnut nittarsaannissarput, nittartagaliornikuugatta neriuutigalugu siunissami tassuuna tuniniaasalerumaarluta, ujaqqanik suliareriikkanik.
- Taamaammat neriuutiginerpaavara immitsinnut nittarsaalluarnissaq taavalu paasisaqarnissaq, paasisassarsiorlutami takanunngaleratta, taama oqarpoq, Arktisk ingeniøritut ilinniarsimasoq Ilannguaq Lennert Olsen maanna annikitsumik aatsitassarsiortutut ingerlatsisutut aallartsisartoq.
Aamma atuaruk Rubinit nunatsinneersut saqqummiunneqartussanngorput
Taassuma suleqatinilu pingasut peqatigalugit attavissanik pilersitsissapput ujaraatiminnillu naliliisitsissallutik. Hans Henrik Berthelsen, Aqqaluk Kreutzmann Miki Mølgaardilu Ilannguaq Lennert Olsenip suleqatigai.
Taakkuali Arizonami ujaqqanik erlinnartunik tunisaqassagunik aningaasartai Nuummi aatsitassanut pisortaqarfimmi tigummigallarneqassasut Ilannguaq Lennert Olsenip oqaatigaa. Mikisumik aatsitassarsiortunut maleruagassat suli tamakkiisumik naammassineqanngimmata.
-Tunisagut amerikami, aatsitassarsiorfikkormiut paarigallarniarpaat. Tassa manna nutaajunermik inatsisitigut aamma nutaajorpalunnermik. Taamaammat paarigallarniarpaat, immaqa ukua akileraarutissat royaltymik akiuliutissat paasiniarlugit qanorpiaq ingerlatissanerlugit, Ilannguaq Lennert Olsen oqarpoq.
Mikisumik aatsitassarsiooq Arktisk Ingeniøritut 2012-mi DTU-mit naammassinikoq taama oqarpoq. Ukiut marluk Inuplanimi sulereerluni meeraallunili sinnattorisarsimasani suleqatissarsioreerluni timaanut ujaraqqanik ujaasisalerniarluni ukioq kingulleq aalajangerpoq.
Maanna pappialarsornerit inissinnissaat tullernguuppoq, nunanilu allaniit nunatsinniit ujaqqat erlinnartuutigut soqutigineqarnersut paasinissaat.
Maannakkummi inuit ikitsuinnaapput ujaqqanik erlinnartunik piaasinnaanissamut qinnuteqarnikut.
- Imatut unammillerteqanngilagut. Immaqa unammillertitut taasaqassagutta ukua True North Gemsikkut aamma rubininik annissuiniartut Kalaallit nunaanninngaanniit, Ilannguaq Lennert Olsen taama oqarpoq.
TV-kkut takutinneqartartumi nunatsinni amerikamiut ujaqqerisut Ice Cold Gold-mi aaqqissuisut suleqatigilerpai, taamaattumik nunatsinneersut mikisumik aatsitassarsiortut sisamanik inuttaqartut kisimiillutik sapaatip akunnerata tulliani nunat tamalaat akornanni takutitsinissaarsuarmi nunatsinni pisuussutitta nittarsaannissaat kisermaatissanngilaat.
