Rubinit nunatsinneersut saqqummiunneqartussanngorput

Rubinit Nunatsinneersut siulliit ujaqqanik erlinnartunik niuffaffinnut aatsitassalerisunullu siullerpaamik saqqummiunneqartussanngorput. Rubininik USA-mi nittarsaassinersuarmi Tucson Gem Showimi, Arizonamiittumi, tamanna pisinnaassasoq ilimagineqarpoq.
Allattoq Mads Lynge
januaarip 21-at 2015 17:17

Rubinit Nunatsinneersut, Ilannguaq Lennert Olsenip, annikitsumik aatsitassarsiorsinnaanermut akuersissutillip, saqqummersinniarpai, suleqatini Eric Drummond, tv-kkut isiginnaagassiami nangeqattaartumi Ice Cold Goldimeersoq peqatigalugu saqqummersitsiniarluni. Eric Drummond, Ice Cold Goldimi ujarassiuut siuttuattut inissisimavoq.

 

Rubininik Nunatsinneersunik USA-mi taama saqqummersitsisoqarnera immikkut taasariaqartoq, isiginnaagassiami nangeqattaartumi tassani ingerlatsisup David Caseyp KNR-imut ilaatigut allaaseraa.

Ice Cold Gold, nunarsuarmi qeqertat annersaanni immiussani pingaaruteqaannanngilaq, rubinilli Nunatsinneersut USA-mi nittarsaassinermi saqqummersinneqarsinnaanngornerannut aqqutissiuusseqataavoq:

 

- Rubinit aappaluttut qaamasut ukua Kalaallit Nunaanneersut nunat tamalaat niuffaffiini takutinneqartut siullersaraat, akisussaassuseqartumillu qallorneqartutut nittarsaanneqarsinnaallutik, Eric Drummond, KNR-imut ilaatigut oqarpoq.

 

Isiginnaagassiaq Ice Cold Gold malinnaavigigukku aamma oqaatigisinnaavarput aallakaatitassiaq nangeqattaartuliaq taanna ukiut pingajussaannik maanna aallakaatinneqartussanngormat, tamannalu ukioq manna marsimi aallartissalluni.