Royal Runernissaraluaq taamaatittoq – Nuummili aappaagu maajimi pissaaq

Royal Runimik taallugu arpatsitsinissamik aaqqissuisut arpatsitsinissaraluartik coronap ajornartoortitsinera peqqutigalugu marlunngornermi taamaatippaat.

Kunngikkormiut tusagassiorfimmut taama nalunaarput. 

Nuummi maajip ulluisa 28-anni arpatsitsinissaraluaq taamaalilluni aamma taamaatippoq.

Tamatuminnga aaqqissuisup, Kim Godtfredsenip, kunngikkormiullu Nuummi arpatsitsinissaraluaq aggustip ulluisa 30-annut kinguartinniarsimagaluarpaat – tamannali ajornarsimammat iluatsissinnaasimanngilaat.

- Tupaallaatigivallaanngilarput. Aappaaguli pinissaanut qilanaarpugut, Kim Godtfredsen KNR-imut oqarpoq.

AAMMA ATUARUK Nuummi Royal Runertoqarnissaa aggustimut kinguartinneqartoq

Royal Run Nuummi aappaagu maajip ulluisa 17-ianni pissaaq. Kunngissaq nulialu peqataassanersut suli ilisimaneqanngilaq.

Kunngissaq nulialu Danmarkimi Sønderborgimi, Aalborgimi, Københavnimi Odensemilu aappaagu maajip ulluisa 24-anni arpatsitsinermi peqataassapput.

Bornholmimi aamma Royal Runertoqassaaq, taakkunanilu arpatsitsinermi isorartussutsit assigiinngitsut pingasut toqqarneqarsinnaapput: Kilometerip aappaata affaata missaa, kilometerit tallimat taavalu qulit. 

Inuit 80.000-nit amerlanerusut Royal Runimi siorna peqataapput. Kunngissaq Frederik nulialu taakkulu qitornaat sisamat peqataapput.