Royal Run coronamik ajornartoornerup kingunerisaanik unitsinneqartoq
Kalaallit Nunaanni septembarimi Royal Runimik taallugu arpatitsinissaraluaq ataqatigiissaarisunit taamaatsiinarneqartariaqarsimavoq.
Danmarks Idrætsforbundip tamanna tusagassiuutinut nalunaarutigaat.
- Kaalaallit Nunaanni ukioq manna arpatitsinissaraluarput taamaatiinartariaqarnera uggoreqaarput ajuusaarutigalugulu.
- Pilersaarusiorneq coronamik nalaataqarnermit akornuserneqangaatsiarpoq, Kalaallit Nunaanullu ilungersunartorsiortitsilluni, timersoqatigiiffiup siulersuisuini siulittaasoq Royal Runimilu aqutsisunut ilaasortaq Morten Mølholm Hansen oqarpoq.
Sumiiffini allani arpatitsinissat pilersaarutit naapertorlugit ingerlanneqassapput. Ukunani København/Frederiksberg, Aalborg, Odense, Sønderborg Bornholmimilu ingerlanneqassalluni.
AAMMA ATUARUK Royal Run aavarfiup nalaani
Naalagaaffeqatigiit avannarlersaani aappaagu arpatitsisoqarsinnaaneranik ataqatigiissaarisunit neriuutigineqarpoq.
- Kalaallit Nunaanni aappaagu arpatitsisoqarsinnaanissaanik aaqqissuusisoqarsinnaajumaarnersoq neriorsuutigisinnaanngilara, aaqqissuusisartullu tamanna piviusunngortissinnaanissaanut siunniussaqarsinnaanissaat neriorsuutigisinnaavara, Royal Runimut aaqqissuuseqataasoq DGI-milu pisortaasoq Jens Otto Størup oqarpoq.
Royal Run septembarip aqqaneq aappaani 2021-mi ingerlanneqassaaq. Kunngissaq Frederiup 50-liineranut atatillugu 2018-mi siullerpaamik ingerlanneqarpoq.