Royal Greenland ukiup affaani siullermi sinneqartooruteqarluartoq
Royal Greenland coronamik tuniluunnnerup nalaani 2021-p ukiuata affaani siullermi akileraareerluni 58 millionit koruuninik angusaqarpoq.
Tamanna ukiup siulianut piffissami tassani 97 millioninik siuariarneruvoq, taamani 39 millionit koruuninik amigartooruteqarfiuvoq.
- Pitsaasumik ineriartortoqarnera pissuseqatigiiaanik aallussanik saattuanik raajanillu issittup imartaaneersunik kiisalu ikerinnarmiunik aalisarnermik, ukioq manna siuariaateqangaatsiartumik aallaaveqarpoq. Taamatuttaaq suliffeqarfiup aningaasartuutai Covid-19 pissutigalugu ajornartoornermut nalimmassarneqarput, Royal Geenlandip naatsorsuutaani pisortamit Michael Thinghuusimit atsiorneqartumi allassimavoq.
Canadap issittuani aallussat angusarissaarnermut pingaarnertut sunniuteqarput, kiisalu Amerikami Avannarlermi Japanimilu niuerfinni atugassarititaasut pitsanngornerat nioqqutissat akii qaffasinnerugaluartut saattuanik tuniniaanermi iluanaaruteqarluarnermik kinguneqarput.
Ukiup affaani angusat pitsaanerpaat tulia
Royal Greenland siornatigut ataasiaannarluni ukiup qiteqqunnerani qaffasinnerusumik angusaqarnikuuvoq. Tamanna pivoq 2019-imi, taamani ukiup qiteqqunnerani angusat 228 millionit koruuniupput, kilisaatilli marluk tunineqarnerat 141 millionit koruuninik iluanaaruteqarnermut pissutaaqataapput.
Royal Greenland coronap nunarsuaq tamakkerlugu tuniluunnera pissutigalugu akitigut appariartortoqarneranik aalisakkerivissuullu nioqquteqarfigineqarpaasaanut tunisassiornermi pissutini ilungersunartorsiornini arlaleriarluni nalunaarutiginikuuaa.
Kinamulli tunisakinnerulernermi annaasat Ruslandimut tunisaqarnerulernermik taarserneqarnissaat iluatsittoq naatsorsuutini allassimavoq. Royal Greenlandili Kinamut nioqquteqarnermi siuariartoq aamma takussutissaqarpoq.
AAMMA ATUARUK Royal Greenland Norgemi pisinermigut kapisillit qaninnerulerai
- Raajat qalipallit niuerutigineqarnerat Kinami niuerfiit ajornakusoortumik inissisimanerannit assartuinermilu pissutsinit ajornakusoortunit eqqugaangaatsiarnikuuvoq, tuniniaanerli eqqarsaatigalugu qaammatit arfinilissaanni nalinginnaasumut killeqqippoq. Tunisinermi akit aammattaaq qaffakkiartorput, nalunaarusiami allassimavoq.
Qalerallilli saarulliillu akii inuit coronamut killilersuinerit pissutigalugit neriniartarfinni nerinnginnerunerat pissutigalugu apparput.
- Niuerfinni killilersuinerit qasukkiartuaartinneqaraluartut Covid-19 suli ajornartoorfiuvoq. ”Ukiumut nalinginnaasumut” 2019-imut sanilliullugu saattuat ilanngunnagit kaaviiaartitat 17 %-imik apparput, nalunaarusiami allassimavoq.
Ukioq tamakkerlugu millioninik nutaamik sinneqartuussangasoq
Royal Greenlandimi 2021 tamakkerlugu siuariartortoqaannarnissaa aqutsisut naatsorsuutigaat. Ukiulli affaani siullermitulli siuariartigisoqassanani.
- Akileraannginnermi angusat nalinginnaasut 2019-imisuulli angusaqarfiunissaat naatsorsuutigineqanngilaq, 150-200 millionit koruuninilli pitsanngoriaateqarsimanissaat naatsorsuutigineqarpoq, aqutsisut allapput itisilerlugulu:
AAMMA ATUARUK Kinamut tunisassiornerup ajutoorujussuarnissaralua Royal Greenlandimit pakkersimaarneqarpoq
- Nunarsuarmi aningaasaqarnerup ineriartornera, matumanilu Covid-19 Tuluit Nunaatalu EU-mut ilaasortaajunnaarnerata kingunerisai, suli nalunartorsiortitsipput.
2020-mi ukiumi angusat 92 millionit koruuninik amigartooruteqarfiuvoq. 2019-imi angusat 267 millionit koruuniullutik.
