Inuussutissarsiutit

Royal Greenlandip tunisassioriaasaani nutaami unammillernartoqarpoq

Royal Greenlandip Maniitsumi tunisassiorfiani saarullinnik ukioq manna tunisassiornera unammillernarsimaqaaq, tunisassiornerlu sapaatip akunnerata siuliani unitsinneqarpoq.

Allattoq Mads Lynge, Jonas Løvschall-Wedel

oktobarip 31-at 2015 18:33

Taamaattoq tunisassiat ineriikkat 250 tonsit Maniitsumi tunisassiorfimmi tunisassiarineqartut Royal Greenlandip nittartagaani atuarneqarsinnaavoq.

- Naak qaammat ataaseq kingusinaarluta aammalu teknikkikkut allatigullu ajornartorsiutit arlaqartut piffissap ingerlanerani nalaattaraluarlutigik, isumaqarpunga ataatsimut isigalugu tunisassiorneq ingerlalluarsimasoq, Royal Greenlandip Maniitsumi tunisassiorfiani ingerlatsisoq Lisbeth Østergaard oqarpoq.

Maniitsup eqqaani bundgarnersorlutik saarullinnik aalisartut pisaanik uumatiinnarlugit aalisariutinik uumatitsiviusunik assartoriarlugit uumatitsivinni ullualuit uninngateriarlugit tunisassiorfimmi aaverlugit tunisassiarineqartarput.

Tunisassioriaaseq nutaaq taanna Royal Greenlandip Maniitsumi tunisassiorfiani siorna 2014-imi misileraalluni aallartinneqarpoq, iluatsilluarmallu ukioq manna annertusillugu ingerlanneqalerluni.

Aamma atuaruk Aalisariutit uumatitsivillit aggerput

Teknikkikkut aporfeqaraluartoq naammagisimaarpoq

Naak teknikkikkut ilaatigut ajornartorsiuteqartarsimagaluarlutik, tunisassiorfiup ingerlatsisuata tunisassiorneq naammagisimaarutigaa, naak tamanna ilaatigut pissutaalluni tunisassiarineqartut ilimagisamit ikinnerulaarsimagaluartut. Tunisassiornerulli aappaagu pitsaanerulernissaa taassuma neriuutigaa.

- Tunisassiornermi ukioq manna misilittakkavut ilikkarfigalugit tunisassiorneq aappaagu nangissavarput, Lisbeth Østergaard oqarpoq.