Royal Greenlandip tunisassiai ajornerpaatut nalilerneqartut

Aalisakkanik tunisassiorfissuup Royal Greenlandip, aalisakkat saaneerlugit tisaat tunisassiaat, danskit aviisianni Søndagsaviisimi mamassusiannik nalilersorneqarmata susunneqannginnerarlugit, akisunerpaanerarlugit taamatullu ajornerpaanerarlugit nalilerpaat.
Allattoq Jaaku Lyberth
maajip 26-at 2014 09:29

- Susunneqarpianngillat panertoornarlutillu -  nerisassianik naliliisartoq Gert Larsen aamma neriniartarfinnut akunnittarfinnullu ilinniarfimmi, Københavnimiittumi ilinniartitsisoq taama naliliivoq. Naliliisartoq alla Maria Kirk Exner, Royal Greenlandip aalisakkat tunisassiai eqqumiitsumik mamassuseqarnerarpai kukkusumillu suliarineqarsimanerarlugit nalilerlugit.

Aalisakkat tunissassiat ajortumik nalilersorneqarnerat Royal Greenlandimit ajuusaarutigineqarpoq.

- Aalisakkat tunisassiat ajortumik nalilersorneqarnerat ilungersunartutut isigaarput, tunisassiallu taakkorpiaat piaartumik misilittassavagut - Royal Greenlandip tunisassiornermik pisortaa, Marianne Kragh Roetboell aviisimi Søndagsaviisimi apersorneqarluni taama oqarpoq.

Aviisi Søndagsavisen sapaatip-akunnerisa naanerini, 1,2 milliuunngorlugu Danmarkimi illunut tamanut agguaanneqartarpoq, Danmarkimi aviisini atuarneqarnerpaasarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq