Royal Greenlandip sulisumi meerartaasa efterskolernerat akilertalerniarpaa

Inuusuttut Danmarkimi efterskolemiissimasut kingusinnerusukkut ilinniagaqalernissaminnut periarfissarissaarnerusarput. Taamaattumik aalisakkanik tunisassiorfissuup Royal Greenlandip sulisumi akissarsiakinnerusut meeraasa Danmarkimi efterskolernerat akilertalerniarpaa.

Sulisunik ataqatigiissaarisup Ulla Skibstedip oqaatigaa, suliffeqarfiup sulisumi kalaallit akissarsiakinnerusut meeraasa Danmarkimi efterskolimiinnissaannik akiliussisalernissaa piffissami sivitsortumi suliniutigineqarsimasoq.

- Namminersorlutik Oqartussat suliffiutigaatigut, inuiaqatigiinnullu akisussaaqataavugut. Inuusuttut Danmarkimi efterskolimiissimasut inuusuttoqatiminnit ilinniagaqarnissamut iluatsinnerusartut ilisimavarput. Taamaattumik suliniummik taamaattumik aallartitsivugut, Ulla Skibsted oqarpoq.

Aalisakkanik tunisassiorfissuup inuusuttut efterskolimiinnerat kisiat akilertarnianngilaa, timmisartumulli bilitsit siumut utimullu akilernerisa saniatigut angerlarlutik juullisioriarnerat angalanerminnilu kaasarfimmiussaat ilanngullugit akilertarniarlugit.

Pilersaarutilli piviusunngortissinnaanissaanut Royal Greenland ataasiinnarmik akornuteqarpoq.

Tassami inatsisinut tunngasut aaqqiivigineqaqqaartussaapput. Angajoqqaammi aningaasanik tunineqarpata tamanna sulisut ajunngitsorsiaasut isigineqassaaq taakkulu akileraaruserneqartussaassallutik.

- Kukkunersiuisuvut atorsinnaassatsinnik qanittukkut aaqqiissutissamik nassaarnissaat neriuutigaara. Tassami inuusuttut afterskolernertik fagitigut inooqataanikkullu iluaqutigisaraat qularutissaanngimmat, Ulla Skibsted naggasiivoq.