Royal Greenlandip aningaasarsiornera pitsanngorsarniarpaa

Atorfininnerminut atatillugu isumaqatigiissut saqqummiukkamiuk anguniakkat taakku marluk saqqummiuppai.

Pisortat tunuarnerminnut atatillugu millionilikkaanik ajunngitsorsiassaqartannginnissaat Mikael Thinghuusip neriorsuutigaa, akissarsiassanilu aamma saqqummiuppai.

Tassa ukiumut 3,5 millionit koruuninik akissarsiassaqassagami. Akisussaaffiup angissusaa, suliffeqarfillu tuusintilikkaanik sulisullip ukiumullu 2 milliardit koruunit sinnerlugit kaaviiaartitalik eqqarsaatigissagaanni taama akissarsiaqarnissaa tupinnanngilaq.

Angusalli naapertorlugit akissarsiaqarnissaa aamma qitiuvoq. Suliffeqarfik angusarissaassappat, pisortaanerup akissarsiami saniatigut aggornersiaqassaaq.

Tunuarunili tunuarnerminut atatillugu millionilikkaanik ajunngitsorsiassaqassanngitsoq isumaqatigiissutigineqarnikuuvoq.

Suliffeqarfiup akiligaanik aviisinik marlunnik pisartagaqassaaq, biileqarsinnaatitaassallunilu.

Sulinngiffeqartarneq pillugu inatsit naapertorlugu sulinngiffeqartassaaq.

Suliffeqarfilli maanna iluanaarutaanngitsup piginnittuminut - tassa inuiaqatigiinnut kalaallinut - iluanaarutaalernissaanut eqqarsaatersuutai suuppat? Mikael Thinghuusip anguniagassaagallartut taakkartorpai:

- Immikkoortut marluupput. Siulleq tassaavoq Royal Greenlandip aningaasarsiornera. Suliffeqarfik tassaasariaqarpoq imminut akilersinnaassumik sulialik. Royal Greenlandip aningaasarsiornera ukiuni kingullerni allanngorartarsimaqaaq, ilaatigut pitsaavallaarnani. Taamaammat aningaasatigut avataaniit ikiorneqaqqinnginnissarput pillugu sulisariaqarpugut, imminut napatissinnaalernissarput anguniartariaqassallutigu, Mikael Thinghuus oqarpoq, nangillunilu:

- Angusassat aappaat pingaarnertut nalilerpara, tassaavorlu suliffeqarfik angusaqarluarusuttoq. ikiorserneqartariaqannginnermik kissaat naammanngilaq. Aningaasarsiorluartariaqarpugut, aningaasallu attartukkavut siunissami qaninnerusumi attartorfitsinnut utertissinnaasariaqarpavut, agguagarsianillu piginnittutsinnut akiliisinnaassuseqartariaqarpugut, matumani Namminersorlutik Oqartussat aamma pineqarput. Taamaaliorsinnaassagutta suliffeqarfik anginerulertariaqassaaq, aningaasarsiornikkullu patajaatsuusariaqassalluta, Royal Greenlandip pisortaanertaava Mikael Thinghuus naggasiilluni oqarpoq.

Mikael Thinghuus Danmarkimi najugaqaannassaaq, Royal Greenlandip tuniniaavii anginerit qanittumik suleqatigisinnaaniassagamigit. Tunisassiorfiit Tysklandimiittut, Polenimiittut Danmarkimiittullu qaninnerussavai, Nunatsinnulli aamma angalasarumaarluni.