Royal Greenlandip aningaasaqarnera Nunatta karsiata isumannaassavaa

Nunatsinni suliffeqarfiit annersaat Royal Greenland aningaasaqarnikkut ajornartorsiortoq, nutaanik Naalakkersuisunngortitsiniarneq pillugu isumaqatigiinniarnermik aqutsisup, Kuupik Kleistip, ullaap tungaa uppernarsarpaa, uppernarsarlugulu Royal Greenlandip aningaasatigut pisariaqartitai 500 millionit koruunit missaanniittut.

Partiit Naalakkersuisunngortitsinissaq siunertaralugu isumaqatigiinniartut IA-p, Demokraatit aamma Kattusseqatigiit Partiiata siuttui, ullo’qeqqanut tusagassiortunik aggersaagamik neriorsuutigaat, suleqatigiinniarlutik isumaqatigiissuteqartut Inatsisartuni amerlanerusuteqarnertik atorniaritsik aningaasat pisariaqartinneqartut aningaaaliissutigineqarneqarnissaannut.

- Inassutigineqarpoq, Royal Greenlandimut piginneqataassutit 250 millioni koruuninik qaffanneqassasut, saniatigullu Nunatta Karsianiit 250 millioni koruuninik attartortinneqassasoq, tassalu koruunit milliardit affaannik massakkut aningaasaliisoqassasoq, Kuupik Kleist oqarpoq.

Sooq Naalakkersuisunngortitsinasiluunniit taamannak isumaqatigiittariaqarpisi?

- Royal Greenlandimi pissutsit sumi tamani oqallisigineqalerneranni toqqissisaataasinnaasunik nalunaartoqarnissaa pisarialerujussuuvoq, tassalu suliffeqarfissuup akiitsuminik aklilersuinissaminut periarfissaqartoq, minnerunngitsumillu suliffeqarfissuup ingerlatai eqqarsaartigalugit. Suliffippassuit kilisaatillu ingerlaannarsinnaanerat qulakkeerneqartariaqarmat. Kiisalu inuiaqatigiinnut pisariaqanngitsumik ernumatitsisoqartariaqanngimmat, naalakkersuisunngortitsinissaq siunertaralu isumaqatigiinniartut siuttuat oqarpoq.

Naalakkersuisunngortitsiniarluni isumaqatigiiniarnerit ingerlaleruttortut, Atassummit saqqummiunneqariataarpoq, Royal Greenlandip aningaasaqarnernikkut ajornartorsiortoq. Tamannalu Naalakkersuisunngortitsiniarlutik isumaqatigiinniartut ajuusaarnartuutippaat, aaqqiissutissamik qulakkeerinnereernermi Inatsisartuni saqqummiunneqarpat pitsaanerutillugu.

Kisianni 500 millioni koruuninik aningaasaleeriataartariaqarneq naalakkersuisunngortussat iliuuseqarsinnaassusiannik killiliissaaq.

- Tassa ukioq mannamut amigartoorutissat taamatut amerleriassapput. Neriuppugut, aningaasanut inatsisiliornermi annertuallaamik sunniuteqassanngitsoq, Royal Greenlandimut aningaasaliissutissat, uninngasuutiniit aningaasalerneqassammata.

Kisianni miserratiginagu oqaatigisariaqarpoq, suliniutissanut nutaanut annertuumik sunniuteqassammat, aammalu suliniutinut allanut aningaasarpassuarnik atuisinnaajunnaaratta, tamannalu assorujussuaq uggornarpoq. Kisianni Nalilinnik annaasaqannginnissaq ajornerusumillu pisoqannginnissaa siunertaralugu taamatut pisoqartariaqarpoq, Kuupik Kleist oqarpoq.