Royal Greenland: Sulisussaaleqivugut

Sulisut suliffimmik paarsinngitsut ilaatigut pissutaasut Royal Greenland allaaserisaqarpoq.

- Tunisassiorfimmi sulisoqarnerup tungaatigut ukioq manna ajornartorsiuteqarpugut. Tunisassiorfimmi sulisut ilaat aalaakkaasimanngillat sulinngitsoortarsimallutillu, taamaattumik suleqatigiiaat ullukkoortartut ataatsit taamaallaat sulisarput. 

- Tamanna saarulliit nerpiinik ukioq manna tunisassiornitta siorna tunisassiornitsinnut sanilliullugu affaannarmik ingerlanneqarneranik kinguneqarpoq, Royal Greenlandip Paamiuni tunisassiorfiani ingerlatsisoq, Ilannguaq Abrahamsen, royalgreenland.gl-imut oqarpoq.

Siorna angusat anguneqaqqinngitsut

Siorna saarulliit tunisat affaat sinnerlugit nerpinngorlugit tunisassiarineqartut, ukioq manna affaat sinnerlugit qerintinneqartariaqarsimasut Royal Greenland allappoq. 

- Saarulliit nerpiinik tunisassiornerup aallartinneqarani suleqatigiiaanik marlunnik - ullukkoortartunik unnukkoortartunillu - pilersitsivugut. Kisianni suleqatigiiaani ataatsini sulisut 30-usartussaammata kiisalu sulisut amerlassusaaa pingajorarterutaat amigaatigineqartarmata suleqtigiiaaneq marlunnik sulisoqarneq iluatsinngilaq. 

- Taamaattumik suleqatigiiaat ataatsit taamaallaat aasaq naallugu sulipput. Oqaatigeriikkattut tamakkiisumik tunisassiorsinnaasimanngilagut, tamannalu pissutigalugu tunisat affaat sinnerlugit qerinasuartippavut, tunisassiorfimmi ingerlatsisoq oqarpoq.

Siorna suleqatigiiaanik marlunnik sulisoqarneq ingerlalluarmat saarulliit nerpiinik tunisassiorfimmi sulisut 70-it missiliorgaat, ukiorli manna 30-nnaasut qerinasuartitsinermilu sulisut aqqaneq-marluusut Royal Greenland allaaserisaqarpoq. 

- Suleqatigiiaanik arlalinnik sulisoqarluta siunissami tamakkiisumik tunisassiorsinnaaniarutta sulisussanik avataaniit tikisitsisariaqarpugut, Ilannguaq Abrahamsen oqarpoq.

Aamma atuaruk Royal Greenland nunatsinni tunisaqarluartoq