Royal Greenland nunatsinni tunisaqarluartoq

Suliffeqarfissuup siornamut naleqqiullugu juulip qaammataani tunisai 1 million koruuninik kaaviiaartitaqarfiunerupput. Tunisallu tassaapput kalaalimerngit nunatsinni tunineqartut.
Assi © : Royal Greenland
Allattoq Kenneth Elkjær
aggustip 12-at 2016 07:00
Nutserisoq Simon Uldum -

Royal Greenland ukioq manna juulip qaammataata tungaanut 3 millionit koruunit nalinginut tunisaqarsimavoq, siornalu juulip qaammataanut naleqqiukkaanni 1 million koruuninik kaaviiaartitaqarnerulluni.

Sulisut tunisassiassanik aammalu suliffissuarni tunisassianik pilertornerusumik assartuisarsimanerat angusarissaarnermut ilaatigut pissutaatinneqarpoq.

- Quersuatsinni qerititsiviutigisumi sullarissunik sulisoqarnerput pissutigalugu pisisartutsinnut aasap ingerlanerani pilertornerusumik aatsisinnaallutalu pilertornerusumik nassiussisarsinnaasimavugut. Taamaattumik tunisassiatta piumaneqarnerunerat pisisartunullu pilertornerusumik aatsisinnaasimanerput nassiussaqarsinnaasimanerpullu kaaviiaartitat amerlanerulernerannut tunngaviupput, Royal Greenlandip Nunatsinni tunisassianik tuniniaaviani sulisoq Ingo Hansen suliffeqarfissuup nittartagaanut taama oqarpoq.

Suliffeqarfissuup tunisassiaata pisiniarfinni piumaneqaraluttuinnarnerat taassuma aamma oqaatigaa.

- Ingammik qullukkat, saarulliit issimi panertitat, raajat, qalerallit pujuukkallu tunisaanerulerput. Taamaattumik soorlu qullukkat aamma saarulliit issimi panertitat tunisassiarisinnaasatta annertussusaannit massakkut annertunerupput, Ingo Hansen oqarpoq.

Kaaviiaartitat amerlanerulernerisa ilutigisaanik Nunatsinni tunisassianik tuniniaaviup quersuaani sulisut amerlineqarput, tamannalu immikkoortortap quersuarmi sulisutut ilinniagaqartunik ilinniartoqalersinnaaneranik aamma kinguneqarpoq.

Royal Greenlandimi tuniniaanermi ingerlatsisup Malik Hegelund Olsenip Nunatsinni tunisassianik tuniniaaviup ingerlalluarnera naammagisimaarluinnarpaa. Sulisullu aamma qujaniarfigai.

- Minnerunngitsumik tunisassiornermik suliaqartut, quersuarmi sulisut tuniniaasullu sullarinnerat pisisartutsinnullu pilertornerusumik sullissisarnerat pillugit qutsavigerusuppakka, Malik Hegelund Olsen Royal Greenlandip nittartagaanut taama oqarpoq.