Royal Greenland nipisat suaannik tunisassiornissamut piareeqqavoq

Tunisassiorfiilli siunissaq ungasinnerusoq eqqarsaatigalugu qanoq pineqassanersut suli nalunarpoq.

Nipisat suaannik tunisassiorneq kujataani ataasinngorpat aallartittussaasoq, qularnaatsumik oqaatigineqarsinnaavoq, Royal Greenlandip tunisassiorfia piareeqqammat:

- Marsip 25-ani ammassaagut, nipisalli suaannik kujataani annertuumik tunisassiortoqarneq ajorpoq, aalisartullu Narsami tunisisarnissaat innersuussutigaarput, Lars Nielsen, Royal Greenlandip tunisassiornermut pisortaa oqarpoq.

Sinerissami tunisassiorfiit allat aamma piareeqqasut, taassuma aamma oqaatigaa:

- Maniitsumi eqqaanilu nipisat suaannik tunisassiorfiungaatsiartartumi tunisanik assartuisarnissaq pillugu suliniuteqaleruttorpugut. Suaat tunineqarsimasut Nuummut ullut tamaasa assartorneqartarnissaat siunniupparput, Lars Nielsen oqarpoq, nangillunilu:

- Arctic Green Food Attumi tunisassiorfeqarnikuuvoq, uagulli Kangaatsiami eqqaanilu katillugit pingasunik tunisassiorfeqarluta, aalisartut nipisat suaannik tamaani taamaammat tunisaqarsinnaanissaqarnissaminnut periarfissagissaarput, Lars Nielsen oqarpoq.

Qasigiannguit pigisaani Ikamiuni aammat tunisassiorfeqarpoq:

- Arctic Green Food Qeqertarsuup Tunuata kujasinnerusortaani tunisassiorfeqarnikuuvoq, Ikamiuni. Tamaani assartuisarnissamut aamma periarfissiiniarpugut, tunisat Qeqertarsualiaallugit Ilulissanulluunniit assartoriarlugit tunisassiariniaratsigit, Lars Nielsen, Royal Greenlandimeersoq oqarpoq.

Tunisassiorfiit tamarmik sapaatip akunneri marluk pingasulluunniit ingerlaneranni ammarsimanissaat, taassuma ilimagaa, nipisalli suaannik tunisassiorneq naappat, taava pisoqassava, aperaarput. Tamanna pillugu oqaaseqarsinnaanissaq siusippallaartoq, oqarpoq:

- Arctic Green Foodip tunisassiorfigisimasai ingerlassinnaassallutigit, Namminersorlutik Oqartussat siusinnerusukkut nalunaarfigereerpavut, tunisassiorfiilli Greenland Propertiesimit pigineqarmata tamanna periarfissaanngilaq. Tunisassiorfiit ilaat Greenland Propertiesimit ammatinneqarniartut taamaallaat tusarparput. Tunisassiorfiit sorliit pineqarnersut tusanngilarput, Royal Greenlandip tunisassiornermut pisortaa Lars Nielsen oqarpoq.

Arctic Green Foodip tunisassiorfiutini ingerlatseqatigiinnut suleqatigisaminut Greenland Propertiesimut 2011-mi nuuppai, taakkuuppullu tunisassiorfinnik maanna ingerlatsisut.