Royal Greenland nakkaattoortitsisinnaavoq
Allaaserineqartumi suliffeqarfissuaq Royal Greenland nunatsinni akiliisinnaajunnaarnernik nakkaattooqattaarnernillu pilersitsisinnaasoq allaaserineqarpoq.
Royal Greenlandip aningaasaqarnikkut ajalusuulerneranik berlingske business-imi oqariartuutit maanna naqissuserneqarlutillusooq ipput, tassa Inatsisartut kiisalu naalakkersuisut Royal Greenlandimi qullersat Nuummi Hotel Hans Egedemi maanna ataatsimeeqatigiimmata.
Tassani paasissutissat pingaarutillit pissarsiariniarneqarput, Royal Greenlandimut koruuninik milliardip affaanik aningaasaliinisssamik inatsisartuni aqagu isummertoqannginnerani.
Suliffeqarfissuaq Royal Greenland massakkuugallartoq 2,3 milliardi koruuninik akiitsoqarpoq.
- Royal Greenlandip saniatigut suliffeqarfiit allat aamma aningaasaqarnikkut ajornartorsiuteqarput, soorlu ammerivik Great Greenland, kommunit ilaat kiisalu namminersornerullutik oqartussat ingerlatsiviisa ilaat, Aningaasaqarnermut Naalakkersuisoq Palle Christiansen Berlingske Businessimit apersorneqarluni oqarpoq.
Royal Greenland ikiorserniarlugu aningaasaliiffigineqanngippat taava Kalaallit Nunaanni suliffeqarfiit akiliisinnaanerat nunarsuarmi aningaasanik atorniartarfinnit tatigineerutissapput.
- Tamatuma kingunerisaanik Royal Greenlandip kiisalu Great Greenlandip saniatigut suliffeqarfiit allat aningaasanik atorniarsinnaanerat ajornakusuulissaaq. imaluunniit Royal Greenlandip aningaasat atugai allatut taasersorneqalissapput, tassa akiitsuisa erniaai annertunerulerlutik. Tamannalu Namminersornerullutik Oqartussat ingerlatsiviisa akiitsuisa akilersorniarnerinut ajornartorsiornermik kinguneqariarataannaavoq, ingerlatsiviillu ilai akiitsunik akilersuinissamut ajornartorsiulissapput, Aningaasaqarnermut naalakkersuisoq Palle Christiansen Berlingske Businessimut oqarpoq.
