Royal Greenland naatsorsuutimigut angusarissaartoq
Ingerlatseqatigiiffik 100 mio. koruunit angusarivai. Ukiumut kingullermut sanilliullugu angusatigut annikitsumik appariartoqaraluartoq, angusat naammagisimaarnartorujussuartut Naalakkersuisut isigaat.
Royal Greenland ukiut pingajussaanni sinneqartooruteqartumik isertitaqarpoq
Taama angusaqarneq piginnittunit tassalu Namminersorlutik Oqartussanit nuannaarutigineqarpoq, ataatsimeersuarnermi Naalakkersuisut siulittaasuat Aleqa Hammond oqalugiarpoq taassuma Royal Greenland-imit sulisut aqutsisut siulersuisullu angusat pillugit pilluaqquai.
- Eqqaamassavarput maannakkut ingerlalluaraluarluta eqqissisimaaginnassannginnatta, kisiannili suli aaqqiissutissanik periarfissanillu nassaarniarnerput ingerlatiinnassagatsigu, Aleqa Hammond oqarpoq -
Royal Greenland angissusaa eqqarsaatigalugu nunatsinni suliaqartuuvoq pingaaruteqartorujussuaq. Suliaqarnisi qanorlu suliaqarnersi ingerlannerissi - tamarmik inuiaqatigiit sinnerini malittaasumik sunniutaasorpassuarnut pingaaruteqarpoq, Naalakkersuisut siulittaasuat oqalugiarami taama oqarpoq.
Ataatsimeersuarnermi ileqqoq malillugu Naalakkersuisut siulersuisunik nutaanik qinersisissapput.
Ukiut tamaasa annikitsumik allannguisoqartarpoq, ukiormanna Marie Fleischer taarserneqarpoq, Pitsi Høegh kujataani takornariartitsivimmi Greenland Saga-mi Qaqortuummiittumi direktøri siulersuini ilaasortanngorpoq.