Royal Greenland naatsorsuutimigut angusarissaartoq
Sinneqartoorutit akileraarutit peernagit 168 mio. koruuniusut siorna naatsorsuutitigut angusanut kusanarluinnartunut akileraarutit peernagit 180 mio. koruuniusunut naleqqiutissagaanni ikinnerulaaraluarput. Suliffeqarfissuup akiitsui erniallit 192 mio. koruuninik aamma ikilisinneqarsimapput.
- Niuernikkut ingerlalluarneq aallaavigalugu iliuusissatut pilersaarut nutaaq aallartisarparput, taannalu naapertorlugu Royal Greenlandip aalisakkerinermi Atlantikup avannaaneersunik pilersuinermi nunarsuaq tamakkerlugu siuttuulernissaa – The North Atlantic Champion-imik taasamik anguniagassatut siunniussaqarpugut, pisortaaneq Mikael Thinghuus oqarpoq.
Royal Greenlandip ukiup naatsorsuuseriffiusup ingerlanerani Tysklandimi Wilhelmshavenimi suliffissuaq tunisimavaa, tamannalu Royal Greenlandip periusissamik nutaarluinnarmik aallartisaanissaanut periarfissiisimavoq.
- Wilhelmshavenimi tunisassiorfimmik tunisinikkut iliuusissatut pilersaarut aallartitsigasuarneqarpoq. Ilaatigut aqutsisutigut nukinnik aammalu Royal Greenlandimi sulisut aalajangersimasut Kalaallit Nunaanni aammalu Atlantikup avannaani niuernermi pingaarnertut aallussaannik sukaterinissamut periarfissaqalerpugut. Aammattaaq tunisassiorfimmik tunisinitsigut akiitsuvut erniallit malunnaateqarluinnartumik ikilisissinnaalerpagut, taamalu niuernermi pingaarnertut aallussanut aningaasaliinissamut periarfissaqalerluni, Mikael Tinghuus nassuiaavoq.
