Royal Greenland: Qalerallit Paamiut nalaanni amerliartorput
Royal Greenlandip nittartagaani allaaserineqartoq naapertorlugu Paamiuni aalisakkanik suliffissuanut qalerallit tunineqartartut amerleriarujussuarput.
Qalerallit 2016-imi tunineqartut katillugit 118 tonsiupput, ukioq mannali maannamut 128 tonsit tunineqareerput sulilu tuninisoqangaatsiarnissaa naatsorsuutigineqarluni.
- Qalerallit angissusaat qiviassagaanni angerujussuanngikkaluarput, kisianni kusanarlutillu amerliartornerat maani tunisassiorfitsinni malugaarput, taamaammat niaquiaalernissarput paperuiaalernissarpullu piareersimaffigilluinnarparput,
Paamiuni Royal Greenlandimi tunisassiorfimmi ingerlatsisoq Ilannguaq Abrahamsen taama oqarpoq
Taamaattorli saarullinnik tunisassiorneq appariarmat aalisakkanik suliffissuup qaleralinnik niaquiaanermut paperuiaanermullu tunisassiornerup aallartinneqarnerani 100-it missaannik amerlatigisut sulisorineqassapput.
Qalerallit erlaviiarlugit qeritinnneqartaraluartut maanna qaleraleqarluarlernerata kingunerisaanik niaquiarlugit paperuiarlugillu tunisassiarineqartussanngorput.
Qaleralinniartarneq piffissami kingullermi oqallisigineqartarpoq, qeqertarsuup tunuani qaleralinnik tunisassiorneq appariarsimammat.