Royal Greenland ilorraap tungaanukarpoq

Tassa ukiut 2011-p 2012-illu akornanni ukiup affaa siulleq naatsorsuusiorneqareermat 71 millionit koruuninik suliffeqarfik sinneqartooruteqartoq paasinarsivoq, siulianilu 59 millionit koruuninik sinneqartoorneq taamaalilluni qaangerneqarluni. Naatsumik oqaatigalugu: Suliffeqarfik Royal Greenland piffissami sivitsulersumi aatsaat taama ingerlalluartigaaq.

Suliffeqarfiup akiitsui ukiuni tallimani aatsaat taama ikilitigisut Royal Greenlandip nalunaarutigaa, tassa akiitsorineqartut 187 millionit koruuninik ikilisinneqarlutik akiitsut 1,7 milliardit koruuniinnanngortinneqarmata.

Tamatuma saniatigut Royal Greenlandip kaaviiaartitai procentinik arfineq pingasunik amerleriaateqarput.

Royal Greenlandip Europami Atlantikullu Avannaani ingerlatai tamarmik siuariaateqarput, tassa kinguppaat qalerallillu Nunatsinneersut tunineqartut amerleriarnerisa saniatigut saarulliit saarulliusaallu kullerit pujuukkat tunineqartartut amerleriaateqaramik.

Taamaammat Royal Greenlandip ukiup naanerani akileraarutit ilanngaatigereerlugit 100 millionit koruuninik sinneqartoornissani naatsorsuutigilerpaa, akiitsullu 250 millionit koruuninik ikileriarsimanissaat naatsorsuutigineqalerluni.

Atlantikup Avannaani Europamilu Royal Greenlandip suliffeqarfii tamarmik ingerlalluarput. Europamimi ingerlatsiviit Royal Greenlandip ineriartorluarneranut tunuliaqutaapput, Atlantikullu avannaani pisat tunisassiarineqarnerini sinneqartoorfiunerpaallutik.

Suliffeqarfissuulli nunarsuarmi aningaasarsiornerup nalorninartorsiorfiuneranit imaaliallaannaq sunnerneqariaannaanera naluneqanngilaq.

Taamaakkaluartorli Royal Greenlandip tamakku anigorluarsinnaasimagai, ukiup affaani nalunaarusiaminni allapput.