Royal Greenland 43 million koruuninik amigartoorpoq

Suliffeqarfimmit, Namminersorlutik Oqartussanit pigineqartumit, 2009-miit 2010-p tungaanut naatsorsuutaasa sinneqartooruteqarsimanermik takutitsinissaat ilimagineqarsimagaluartoq, amigartoorutit 43 million koruuniusut takuneqarsinnaavoq.

Suliffeqarfiup naatsorsuutai saqqummiuneqartut Naalakkersuisut siulittaasuata, Kuupik Kleistip tusaatissatut tigunerarpai, ukiunili kingullerni amigartoorutaasartut siullermik 78 million koruuniusinnarlutik kingorna 196 million koruuniusinnarlutik maanna 43 million koruuninngormata, tamanna ilorraap tungaanut aallariarnermut takussutissaasoq, nammineq maluginiararpaa.

Royal Greenlandip naatsorsuutinut nutaanut atatillugu tusagassiuutinut nalunaarutini aallartillugu oqaatigaa, siorna angusaasuniit 159 millionkoruuninik pitsanngoriaallanneqartoq, maannali 43 million koruuninik amigartooruteqarneq naammaginanngitsoq nassuerutigalugu.

Suliffeqarfiup qaammatit pingasut matuma siorna sinneqartoorsinnaanaviaratik nalunaarutigereersimagaa, Naalakkersuisunit nalunaarutigineqarpoq.