Royal Arctic Linep amigartoorutini affaannanngortikkai
Siulersuisuini siulittaasup Kuno Fenckerip naammaginartutut tamanna taavaa, aammalu 2014-imi ukiup affaani siullermi angusanut 31 millionit koruuninik amigartooruteqarfiusumut naleqqiullugu amigartoorutit affaannanngortinneqarsimanerat nuannaarutiginerarlugu.
RAL-illi ukiup affaanut nalunaarusiaani isumalluartoqarpallaanngilaq, tassanimi naqissuserneqarmat umiarsuaatileqatigiiffiup Namminersorlutik Oqartussanit pigineqartup siunissaq unammilligassartalik ornikkaa.
- Qattuneq sivingajaarsuaq qaqiniagassarilissavarput majuariaalu maanna tikilivipparput, siulersuisuni siulittaasoq Kuno Fencker oqarpoq.
AAMMA ATUARUK RAL sinneqartooraluarluni sukateriuassaaq
Siulersuisuni siulittaasup piffissami aggersumi aningaasatigut unammillernartoqarnissaa tikkuarpaa, assartuinermullu akit tatineqarsinnaanerat oqaatigalugu.
- Umiarsuit umiarsualiviillu siunissamut aningaasaliinerupput. Suliffeqarfiup iluani taakku annertuumik allannguissapput, iluaqutilli tamarmik ataatsikkut malunniunnavianngillat. Aningaasartuutilli erngertumik sunniuteqartussaapput. Kalaallit Nunaannut pingaartuupput assartuinermi akit aalajaatsut taamaattumillu aningaasartuutit maanna nalunngisagut ikilisartariaqarpagut.
RAL-ip aningaasartuutikillisaasimanera ukiup affaani siullermi aningaasarsiornikkut siuariartoqarneranut aamma peqqutaaqataavoq. Isertitammi ukiup affaani siullermi ikileriarsimapput, akikinnerusumilli ingerlatsinikkut amigartoorutaasut ikilisinneqarsinnaasimallutik.
