RAL sinneqartooraluarluni sukateriuassaaq
Royal Arctic Line millionilikkaanik siorna sinneqartooruteqarpoq, Royal Arctic Linellu sinneqartoorutini sulisunii, siulersuisuinilu naalakkersuisullu siulittaasuat peqatigalugu ualillualersoq ataatsimeersuarnerminni saqqummiuppai.
Naalli suliffeqafik sinneqartooraluartoq suliassanut tunngatillugu annerusumik allannguisoqarnavianngitsoq, siulersuisuini siulittaasup, Kuno Fenckerip ataatsimeersuareernerup kingorna oqaatigaa.
- Sinneqartoorutit piinnarlugit allannguinerit takkunnavianngillat, aamma sinneqartoorsimasuugutta imaluunniit amingartoorsimasuugutta suliassagut suli taakkuussapput, inuiaqatigiinnut assartukkanik tunniussuinitsinut ataqatigiissaarineq ingerlatissallugu, Royal Arctic Linep siulersuisuini siulittaasuat, Kuno Fencker oqarpoq.
Royal Arctic Line 2014-imi 30 millionit koruuninik sinneqartooruteqarpoq, taakkulu sinneqartoorutit suliffeqarfissuarmiiginnassasut, naalakkersuisut siulittaasuata, Kim Kielsenip ullumi ataatsimeersiarnermi akuersissutigaa.
Aamma atuaruk RAL-ip amigartoorsimaneq sinneqartoorninngortippaa
Assartuineq siorna akitsorneqarpoq, maannamullu sinneqartooraluartoq assartuineq akikillineqassanngitsoq, Kuno Fenckerip oqaatigaa.
Isertitaqarluarnerup kinguneranik akikillisaasoqarnissaa qilanaartuutigineqassanngilaq.
Suliffeqarfissuarmi aningaasanik atorluni umiarsuarnik nutaanik tallimanik pisinikuuvoq, Nuummilu ukiup tulliani naammassisussamik talittarfiliorniarput.
Taamaammat Royal Arctic Linep sukateriffigeqqinneqarnissaa siulersuisut siunertaraat, aningaasat umiarsualiortitsinermi atornikussaat sinneqartoorutinik matussuserneqassammata.
-Imaanngilaq pitsanngorsaanissaq periarfissaq unitsikkipput, pitsanngorsaassuugut talittarfissaq nutaaq eqqarsaatigalugu qanoq artorluassuarput, inuaqatigiinnut qanoq ilillugu pittaanerpaamik kingunissaqartissuarput taavalu umiarsuillu nutaat inuiaqatigiinnut pitsaasumik kinguneqartissinnaavagut, Kuno Fencker oqarpoq.
Aamma atuaruk RAL Naalakkersuisut siunnersuutaat pillugu: Unammillernartoqassaaq
Royal Arctic Linep pisortaa, Jens Andersen ataatsimeersuarnermi tunuarpoq, pisortartaassarlu Verner Hammeken aggustip qaammataani atorfinikkumaarluni.
