Inuussutissarsiutit

RAL-ip amigartoorsimaneq sinneqartoorninngortippaa

Namminersorlutik Oqartussat umiarsuaatileqatigiiffiata Royal Arctic Linep 2014-imut naatsorsuutini saqqummiummagit paasinarsivoq, 36 millionit koruuninik sinneqartoortoq, naak ukiup siuliani 20 millionit koruuninik amigartoorsimagaluarluni.

Allattoq Hagen Højer Christensen

marsip 31-at 2015 10:40

Nutserisoq Elisa Isaksen

Tamatuma assigaa aningaasaqarnikkut angusat 56 millionit koruunit missaannik pitsanngoriaateqarnerat. Angusat umiarsuaatileqatigiiffimmi aqutsisut naammagisimaarpaat.

Tusagassiuutinut nalunaarummi aningaasarsiornikkut siuariarneq pingasunik makkuninnga peqquteqartoq oqaatigineqarpoq.

Aningaasartuutit ingerlaavartumik ingerlanneqartunut naleqqussarneqarput taama iliornikkullu aningaasartuutit aalajangersimasut 30 millionit koruuninik ikilisinneqarlutik.

Aamma atuaruk RAL ukiuni 19-ini siullerpaamik amigartooruteqartoq

2014-imi marsip aallaqqaataaniit assartuinermi akit 5 procentinik akitsorneqarput tamatumalu kinguneranik kaaviiaartitat 22 millionit koruuninik amerlanerulerlutik. Tamatuma peqatigisaanik kisermaassilluni ingerlatsiviit avataanit kaaviiaartitat 9 millionit koruunit missinginik amerleriarsimapput.

Ikummatissap akikillineratigut ”killormut ingerlanerup” erniatigut assigisaatigullu aningaasartuutit ammut naqippai aamma uuliamit nunallu allat aningaasaannut ilassutit ammut naqillugittaaq.

Taama iliuuseqarnikkut sinneqartoorutit akileraarutit sioqqullugit 36 millionit koruuniulerput, tassalu akileraareernerup kingorna sinneqartoorutit 24 millionit koruuniulerlutik.

Angusat pitsanngoriaateqarput naak assartukkat 2013-imi taakku 747.000 kubikmeteriusimariarlutik 2014-imi 741.000 kubikmeterinut ikileriaraluartut. Taamaalilluni assartukkat ukiut qulit iluini aatsaat taama ikileriartigisut naatsorsuutinut oqaaseqaammi taaneqarpoq.

Nutaarsiassami kukkunermik nassaarsimaguit uunga allaffigineqarsinnaavugut.