RAL ukiuni 19-ini siullerpaamik amigartooruteqartoq
Immaqa tupaallannanngikkaluarpoq, suliffeqarfissuarli amigartooruteqarpoq. Tusagassiuutinut nalunaarumi allassimasut naapertorlugit umiarsuaatileqatigiit 1995-imili, tassa ukiut 19-it matuma siornali, aatsaat siullemeerlutik amigartooruteqarput.
Amigartooruteqarnermut pissutaavoq, soorlu siusinnerusukkut nalunaarutigineqareersoq, usit assartortakkat annertuumik annikilleriarnerat.
- Usit assartorneqartut katillugit 9,1 procentimik appariarnerisa kinguneraat, kaaviiaartitsinerup 50 millionit koruunit sinnerlugit appariarnera. Tamanna naatsorsuutini annertuumik malunnarpoq, taakkumi inerneraat amigartoorutit akileraaruteqareernermi 14 millionit koruunit, Royal Arctic Linemit allapput.
Tamanna umiarsuaatileqatigiiffimmut naammaginanngilaq. Allaqqunneqarsinnaasimanngilarli, siulersuisuni siulittaasoq, Martha Labanseneq oqarpoq.
Royal Arctic Linep suliffeqarfissuartut naatsorsuutitigut 2013-imi anusaasa takutippaat, akileraaruteqannginnermi aamma ikinnerussuteqarluni piginneqataassutini pissarsiassaat akiliinnginneranni amigartoorutit 20 millionit koruunit mssaanniittut, aamma akileraarutit akilereerlugit 14 millionit koruuniullutik, 2012-imut sanilliussilluni akileraaruteqannginnermi 7 millionit koruunit, aamma akileraaruteqareernermi 6 millionit koruunit.
Tassaluuna tamakkununnga ilaatigut atatillugu, usinut assartortakkanut procentinik tallimanik qaffaanissamut Royal Arctic Line Naalakkersuisunit akuerineqartoq, tamannalu ukioq-manna marsip ulluisa aallaqqaataannit atuutilerpoq.
