Royal Arctic Linep umiarsuaa Tasiilamut tikikulanerusalissasoq
Royal Arctic Linep Tasiilami innuttaasut saaffiginnissutaat arajutsisimanngilaa, taamaattumik Tasiilaq umiarsuarmit akulikinnerusumik tikinneqartalersinnaanersoq misissorniarpaa. Umiarsuaatileqatigiiffik tusagassiutinut nalunaarummini taama allappoq.
Tasiilami innuttaasut atsiornernik katersaat 434-usut Royal Arctic Linemut novembarip aallaqqaataani 2019-imi nassiunneqarput. Royal Arctic Linep umiarsuaata ukiunnginnerani sikunnginneranilu akulikinnerusumik kingusinnerusukkullu tikittalernissaat innuttaasut kissaatigaat.
Royal Arctic Linep umiarsuit angalanissaannut pilersaarutaa maanna atuuttoq malillugu Tasiilaq umiarsuarmit ukiumut quleriarluni tikinneqartarpoq.
Umiarsuarmik ukioq manna aqqusaaqqittoqarnavianngitsoq
- Umiarsuaq siulleq Tasiilap avataani sikorsuit juunip aallartinnerani aqqutigineqarsinnaaleraangata tikikkajuttarpoq, tamatumalu kingorna Tasiilaq umiarsuarmit umiarsualivianut pulasinnaasumit sapaatit akunneri pingasukkuutaarlugit tikinneqartarluni. Umiarsuarlu kingulleq nalinginnaasumik novembarip qiteqqunnerani tikittarpoq, tamatumalu kingorna sikorsuaqalersarluni, umiarsuaatileqatigiiffik taama allappoq.
Atsiornernik katersisoqarnera tunngavigalugu umiarsuarmik ataatsimik aqqusaaqqittoqarnissaanut ukioq manna periarfissaqarnersoq Royal Arctic Linep misissorpaa. Umiarsuarmilli ukioq manna aqqusaaqqittoqarnavianngilaq.
- Umiarsuarmulli angalatissinnaasatsinnut Pilersuisoq nassiussassanik pissarsisinnaasimanngilaq, umiarsuup angalatissinnaasatta ullormi aallarfissaanut piareersinnaasimanngimmat, Royal Arctic Line allappoq.
Umiarsuaq immaqa tikikulanerusalissasoq
Taamaattumik Royal Arctic Linep siunissami allatut aaqqiissuteqarsinnaanerluni misissorniarpaa. Royal Arctic Line Islandimilu umiarsuaatileqatigiiffik Eimskip aappaagu suleqatigiilissapput, tamannalu Royal Arctic Linep assartuusseriaatsiminik allanngortitsineranik kinguneqassaaq.
Tamanna ilutigalugu umiarsuarmik Islandimiit Tunumukartitsisalernikkut Tunup umiarsuarmit akulikinnerusumik tikinneqartalernissaa anguniagaraat.
- Assersuutigalugulu aaqqiissutaasinnaasut ilagaat Islandimut toqqaannartumik attaveqalernera, sikuunnginnerani akulikinnerusumik umiarsuaqartalerluni. Taamatut allanngortitsisoqarneratigut Tasiilap siusinnerusukkut kingusinnerusukkullu tikinneqarsinnaaneranut eqaannerulersitsissaaq, sikuunera silalu apeqqutaatillugit.
Royal Arctic Linep naatsorsuutigaa, suliniutini nutaat qaammatit tulliit marlussuit ingerlanerini sukumiinerusumik paasissutissiissutigisinnaassallugit.
