Rotaryp meeqqat angerlarsimaffiini najugaqartut juullisiornissaat nuannernerulersippaat
Rotary nunarsuaq tamakkerlugu ikiuiniaqatigiiffiuvoq, maanilu Nunatsinni suliassartik pimoorulluinnarpaat. Brugseni GA-lu suleqatigalugit ippassaq aaqqissuussamut 40.000 kr.-it nalinginut juullimut tunissutissarsisoqarpoq, tassanilu Bamse Kyllingilu Juullip Inualu aamma alakkaapput.
-Brugsenip aaqqissuussinitsinnut ikiuulluarnera iluatsitsissutigaarput. Tunissutissat tamaasa poortorpaat, allattorsimaffiillu malillugit "-mit -mut"-inik allattuillutik, aamma aaqqissuussinermut aningaasaleeqataavoq. Meerarpassuit oqitsuinnaanngitsumik peroriartorsimasut nuannaartissinnaagatsigit iluarusuutigeqaarput. Peqataanermikkut tunissutisinermikkullu nuannaarnerat peqqissiminanngeqaaq, Otto Strømmand Nuummi Rotarymeersoq oqarpoq.
Nuummi Rotary suliarpassuaqarpoq. Ilaatigut ilinniartut najugaqarfik Rotarykollegiet, maannakkorpiaq nutarterneqartussanngortoq, ingerlataraa. Aammali meeqqanik sullissivik Mælkebøtten Rotarymit aningaasaliiffigineqartarpoq pisunilu allani rotarymiut aamma tunissuteqartuusarlutik.
-Ukiup ingerlanerani qinnuteqaaterpassuarnik nassinneqartarpugut, siunertarineqartorlu pitsaasutut nalileraangatsigu, aningaasaliiffigitinnissamut periarfissaqarluartarpoq. Ikiuussinnaanerput uatsinnut nuannaarutaajuaannarpoq, ippassarlu unnukkut aaqqissuussinerup kingorna suliatta iluaqutaanera takuneqarsinnaavoq, Otto Strømman Nuummi Rotarymeersoq isumaqarpoq.
Assiliisartoq Toke Brødsgaard ippassaq unnukkut najuuppoq, taannalu akeqanngitsumik assiliisuuvoq aammalu allaaserisap matuma assitaanik assiliisuulluni.
-Meeqqat ataasiakkaarlugit taaneqartarput Juullip Inuanillu imminoqqissaaq toqqarneqarsimasumik tunissutissarsisarlutik. Tunissutit tamaasa Rotarymit Brugsenimillu aningaasaliiffigineqarput, tunissutillu ajunngilluinnartuupput. Meeqqat nuannaarnerat isaanni arajutsisassaanngilaq. Pilluarpasinnerat misigissallugu nuanneqaaq, Toke Brødsgaard oqaluttuarpoq.
